Diabierna atardi, den careda di 3:00 pm a tuma luga un accidente basta pisa, unda cu dos auto a dal frontal den otro y caminda un di e ocupantenan no tabata reacciona.
Polis tabata man yen cu diferente accidente pasando rond di nos isla. Lamentablemente un di nan tabata n’e birada skerpi na Macuarima direccion Warawara y un miembro di cuerpo policial mes tabata envolvi. Un Hyunday Accent shinishi (A- 52316) y un Toyota Corolla shinishi ( A-4238) a dal fuertemente den otro, rib’e caminda aki.
Desafortunadamente por a constata ademas di e birada, cu e caminda ta muha cu a pone cu e autonan lo a slip. E suceso a pasa den careda di 2:40 pm den e birada skerpi di Warawara/ Macuarima.
Polis a pidi presencia di ambulance y brandweer cu suma urgencia n’e sitio, p’asina brinda asistencia mas lihe posibel, aunke cu polis a duna un man.
Polis no a warda riba yegada di brandweer, y nan mes a busca pa ranca e porta unda a saca un di e victimanan di accidente. Un di e victimanan no tabata reacciona. Esey a pone pa pidi p’e specialistanan di polis, pa bin haci e investigacion necesario relaciona cu e accidente pisa aki. Tin di bisa cu warda di polis ta hopi cerca di e sitio di accidente y cu varios polis a presenta. Mesora a cuminsa indica cu ta trata di un polis envovli den e desgracia aki.
E prome victima, un persona femenino, a bay den ambulance cu urgencia pa hospital pa tratamento medico avansa. Personal di slachtofferhulp tambe a presenta n’e sitio.
A haci tur intento pa salba bida di e hoben, kende ta un miembro di Cuerpo Policial di Aruba. Pa 3:21 Dr. Anthony a constata fayecemento di colega policial, Austin David Illes, naci na Aruba dia 28 november 1998.
Austin David Illes di 24 aña di edad, cu apenas algun aña den dienst den atraco team, segun declaracion di vocero policial, Lito Lacle. E hoben aki a drenta scol pa polis pero pa motibo di contratiempo cu salud no por a continua. A drenta como miembro administrativo den departamento di recherche. Un sla hopi duro pa Cuerpo Policia di Aruba como cu ta trata tambe di un yiu di un miembro di e famia blauw. Su tata ta recherche di un di e departamento relaciona cu droga y/of atraco.
Informacion cu a ricibi na sitio for di sindicato di polis, a indica cu e vehiculo envolvi den e accidente ta di e departamento di recherche, e vehiculo aki no tabatin airbag y cu a haci e sla/ impacto tabata uno sumamente fuerte na e dashboard, cu consecuencia fatal.
Na famia di e fayecido Headline Group, cas editorial di 24ora.com y TREMPAN, ta extende su mas sentido di profundo condolencia.
