Awe mainta Corte Supremo na Den Haag a trata e caso cu Pais Aruba y Pais Corsou a cuminsa contra e sentencia di nos Hof, cu a habri matrimonio na Aruba y na Corsou pa pareha di mesun sexo. E dos gobiernonan a apela bisando cu Hof a sinta riba stoel di parlamento pero no a durf bisa cu nan ta contra e matrimonionan menciona. Pero ta mustra cu esey si ta e caso!
A “livestream” henter e tratamento di e caso awe den Corte Supremo. Algo cu no ta pasa den tur caso! Abogadonan David Wever di Aruba y abogado Mirto Wever di Corsou a haci nan debut na Corte Supremo y a presenta nan defensa banda di e abogadonan Hulandes. Tambe por a nota diferente persona di Aruba y Corsou cu a bay te Hulanda pa presencia e caso.
Por remarca tu tanto mr. David Wever y Mr. Mirto Murray, tur dos a luci cu nan defensa. Na final dos señora di Corsou cu kier casa cu un otro dama a haya oportunidad pa duna un palabra final cu tabata hopi emocional y cu a conmove tur esnan presente.
Si Corte Supremo rechasa e demanda di e gobiernonan, e sentencia di Hof lo bira definitivo y e ora lo habri matrimonio tambe pa parehanan di e mesun sexo. Si Corte Supremo honra e apelacion, e ora e matrimonio lo keda limita na parehanan di e sexo opuesto. E ora personanan di e mesun sexo lo no por casa y lo depende di un cambio di ley den futuro. Pa locual ta esaki, no ta mustra cu Parlamento di Aruba lo pasa un ley asina. Specialmente e partidonan grandi, tin reto pa convence nan “achterban”. Te awo, ta e fraccionnan mas chikito den Parlamento a vocifera nan sosten incondicional na igualdad.
Dia 19 di januari 2024 e procurador general lo duna un conseho na Corte Supremo. Despues di esey Corte Supremo lo dicta sentencia. Ta anticipa cu esey lo por sosode na maart 2024, aunke e lo por ta prome tambe.
