Diaranson, dia 8 di november, scol basico Colegio Conrado Coronel na Morgenster a ricibi bishita di Minister Geoffrey Wever. E mandatario a tene un encuentro cu e muchanan di 6e klas. E obhetivo principal tabata pa discuti y conscientisa e hobennan tocante e importancia di desaroyo sostenibel y con nan mes por contribui na un futuro mas sostenibel pa e proximo generacionnan.
Durante e bishita, Minister Wever a comparti su vision y pensamento tocante desaroyo sostenibel, enfocando riba e areanan manera conservacion di medio ambiente, uzo responsabel di e recursonan natural y promocion di tecnologia limpi. El a pone enfasis riba e papel crucial cu e muchanan mes por hiba den e lucha contra e cambionan climatico y e otro desafionan medio ambiental.
E discusion tabata uno interactivo, unda cu e alumnonan a keda profundamente envolvi. Nan a haci pregunta, comparti nan ideanan y expresa nan preocupacionnan tocante e futuro di nos isla y mundo. Minister Wever a elogia e entusiasmo y curiosidad di e hobennan. El a motiva nan pa sigui busca conocemento y pa compromete nan mes den accionnan concreto pa yuda proteha y mehora nos planeta.
Minister Wever a apunta riba e importancia di educacion tambe den e proceso di fomenta un mentalidad mas consciente y responsabel riba tema di medio ambiente. El a subraya cu educacion ta e yabi principal pa capacita e proximo generacionnan pa enfrenta e desafionan cu lo bin y pa nan por tuma e decisionnan informa y sostenibel.
Na final di e encuentro, tanto e alumnonan como e docente a expresa nan gratitud pa e oportunidad di por a interactua directamente cu Minister Wever y pa e conocemento valioso cu nan a ricibi. Esaki sin duda ta un paso significativo den e direccion corecto. E combersacion aki ta e comienso di un dialogo continuo, cu colaboracion entre gobierno y e comunidad educativo, pa logra un futuro mas sostenibel pa un y tur.
