“Awe e contratista mester a entrega nos e proyecto y habri Wilhelminastraat. Lamentablemente e contratisa a informa nos cu e compania cu mester a entrega nan klinkers no tin mas disponibel na e momento aki pa asina nan caba cu e trabou”, asina Dienst Openbare Werken a informa un rato pasa. Ta trata aki di e trabou di embeyecimento tumando luga rond di Columbusstraat y Wilhelminastraat.
Awe diabierna e compania lo entrega e resto di e klinkernan pa asina e contratista por caba cu e trabou. A compronde for di e contratisa cu nan mester 5 dia mas di trabou (werkdagen) pa asina por habri e caminda.
“Nos ta lamenta e situacion y manera nos tin mas informacion nos lo informa comunidad di Aruba”, asina DOW a duna di conoce.
Dia 16 di october a cera e caminda y DOW e tempo ey a bisa cu lo ta pa tres siman. Ta resulta cu awo lo mester por lo menos un siman mas pa por finalisa cu e trabou di embeyecimento. Henter e proyecto, incluyendo e parti den Columbusstraat, a dura mucho mas cu a anticipa, debi na supuesto “sorpresa” ora a coba pa core tubonan nobo. En bes di trece alegria, e proyecto a causa mas inconveniencia na comercio den e area.
