Abogado Hose Figaroa pa hopi aña caba ta atende cu aspectonan legal di sindicato Federacion di Trahadonan di Aruba (FTA) y esaki ta e caso tambe cu e situacion reinante cu CITGO, unda cu empleadonan a haya notificacion cu nan ultimo dia di trabou ta riba 30 di januari awo. Y e oferta cu nan a haya ta lo minimo cu ley ta exigi. Algo cu e sindicato a bisa di no kier acepta, pasobra ainda pasobra nan ta sinti cu nan no ta hayando contesta riba preguntanan relaciona cu translado di e empleadonan pa e operador nobo di e refineria y/of terminal di combustibel.
Abogado Figaroa a splica e situacion legal, unda cu CITGO na e momentonan aki ta operador di e refineria como di terminal di e combustibel. Ta den proceso pa firma un documento cu Gobierno y/of RDA finalisacion e acuerdo y entrega bek e instalacionnan na Aruba. Na momento cu esey sosode, CITGO no ta den “picture” mas y e pregunta ta: Kico lo bay pasa cu e empleadonan.
Loke hopi hende no sa ta cu e operacionnan di e terminal y e Marine Department no por stop, pasobra combustibel lo no por drenta Aruba. Manera tur hende sa, Aruba no ta produci combustibel y esaki ta wordo importa.
Tin diferente schakel ora cu ta importa e combustibel y escencial den esaki ta e Departamento Marino, cu ta encarga pa trece e tankeronan aden, y e operacion di e terminal cu ta baha e combustibel. Pues ta operacionnan cu no por stop. Si CITGO stop mes, un otro lo mester tuma e departamento- of seccionnan aki over.
Ora a cuminsa combersacionnan cu Refineria di Aruba (RdA) algun luna pasa, e impresion cu FTA a haya tabata cu RdA lo tuma e operacionnan aki over. Den e negociacionnan ey hasta a papia di cuponan di trabou, e cantidad di hendenan cu lo mester pa e seccionnan ey sigui draai. P’esey FTA a keda sorprendi cu aworaki ta papiando cu tur hende mester bay cas. Ningun momento tabata e intencion cu tur hende mester bay busca, pasobra un parti mester keda pa e dos operacionnan ey.
Mirando con avansa e situacion ta, FTA no ta hayando claridad kende of cual compania ta bay tuma e operacionnan aki over. “Ta sumamente importante pa nos sa esaki. Tin un grupo potencial di trahado cu por mantene nan trabou aki. Pa ley, na momento cu un operador nobo tuma over tur hende ta bay over cu tur nan beneficionan. Pues den e caso aki no ta full e grupo mester perde nan trabou. Ta importante pa sa cual grupo ta sigui y cual no. Pa e grupo cu tin cu bay tin cu saca e miho pakete posibel,” e Abogado a bisa. Pero asina mes por bisa caba cu locual tin riba mesa no ta aceptabel, ya cu esey ta e minimo cu ley ta garantisa cu nan tin derecho riba dje.
E proceso pa e retiro mes ta tuma rond di tres luna.
Pues aworaki loke cu FTA kier ta no solamente un clarificacion riba mehoracion di e pakete pa esnan cu tin cu bay, pero tambe futuro di esnan cu lo keda den servicio di esnan cu tuma e terminal y e departamento marino over.
Ta straño pa nan cu no ta mustra cu tin un operador. Nan a kere cu ta RdA pero ta parce cu esey no ta e caso, di loke nan a mira den prensa.
Tur carta cu nan manda ta bay pa CITGO, Gobierno, RdA y Mediador di Gobierno, por si acaso surgi cualkier situacion di conflicto.
