Faltando algun ora pa Pasco, polis a ricibi yamada p’un caso caminda a topa un curpa canto di caminda na Matividiri, rib’e caminda pa bay pa Ostrich Farm. Aki ta caminda cu un hende homber canando cu su cacho a topa cu un curpa alrededor di 7:00 pm. Mesora a bati alarma na polis.
Na yegada di polis berdad a topa cu e curpa. Na nan turno mesora a bati alarma na ambulance p’asina bin brinda atencion medico. Ambulance no por a haci nada mas pa e persona. Ta trata di un hende homber. Na prome instante a kere cu ta trata di un caso di hit and run.
Durante un entrevista exclusivo cu vocero suplente di Cuerpo Policial, Liliana Rasmijn, el a conta cu e caso ta hopi straño. E por confirma cu e curpa tin algun ora canto di caminda pero no por bisa si ta traha di un hende homber di edad jong of mas avansa. No a topa tampoco piesa di auto cerca di e curpa.
Rasmijn a comenta cu ta mustra cu ta trata di un crimen, pa cual ta suficiente motibo pa tuma e curpa den beslag. Mirando cu ta trata di un investigacion den desaroyo, polis di trafico y recherche a presenta n’e sitio.
A nota tambe presencia di altocomisario di polis, drs. Ramon Arnhem, kende algun ora prome cu Pasco tambe tin uniform bisti p’asina labora hunto cu su coleganan.
Pa 8:35 pm dokter Texier a constata morto di e hende homber. No a top’e cu ningun identificacion riba dje pa cual ta hacie dificil pa haya sa su personalia.
Rasmijn ta stimula e comunidad, si bo sa di algo of a mira algo of si bo ser keri ainda no a yega cas, yama central di polis na 100 y informa nan di bo situacion, kende ta spera cu esaki por contribui n’e investigacion.
