E hoben David Douglas a mira un video riba e plataforma TikTok, caminda a decora un auto completo na luz. Un video cu a ricibi miyones di views. Carlos Yedallah di Headlines Group a sosotene un entrevista cu David Douglas, kende a decora henter su auto.
Douglas a gusta e idea y mesora a yama su primo y cont’e di e idea. A dura mas o menos un dia y mey pa nan haci e idea un realidad. A converti e video di TikTok den e prome auto na Aruba completamente decora na luz. E no tabata un trabou facil, sinembargo un tremendo inspiracion pa lanta e spirito di Pasco riba nos isla.
Aunke cu Douglas tabata masha corto den palabra, e kier desea henter e pueblo di Aruba un feliz Pasco. Adicional, e ta pidi tur hende pa no bebe hopi y ta pa consciente ora di stuur auto. Su auto mes ta marca Nissan modelo Fairlady Z. El a conta cu durante e ultimo dianan tras di lomba, e hendenan ta birando loco su auto. Ta blokie riba caminda, pidie hala un banda pa saca foto cu su auto. Cu hopi pasenshi e laga nan saca foto y hasta sinta den su auto pa saca potret.
