Team di aresto den un accion formal riba caminda di Aruba. Un persecucion cu a pasa den diferente bario a bin caba na Alto Vista cu un persona masculino y uno femenino deteni.
Un poco prome cu 4:00 pm a cuminsa drenta informacion di comunidad cu tin un persecucion andando y cu mester a baha caminda pa evita lo peor. Esaki tabata relaciona cu un entrada hudicial en conexion cu un caso di droga, cu a bira un persecucion, cu team di aresto tabata efectuando y cu a pasa entre otro den Santa Cruz, Piedra Plat y caba na Noord.
Na Alto Vista a tuma nota di un Nissan Versa cu basta daño material. Informacion cu tin te na e momento aki, ta indica cu diferente entrada hudicial lo a bira algo mas peligroso. Inicialmente tabata papia di un persona den un vehiculo cu lo a tira un arma di candela for di bentana durante persecucion den area di Papaya, Paradera. A logra para e vehiculo den area di Alto Vista y detene dos persona na e sitio. A constata despues cu tabata trata di droga cu a tira for di vehiculo.
No ta descarta cu lo tin mas hende envolvi. Locual cu ta sigur ta, cu e persecucion aki tabata uno dramatico pa e chauffeurnan riba caretera, cu mester a baha caminda pa evita impacto frontal cu dicho autonan envolvi.
No tin informacion ainda riba e caso pero e team di 24ora ta riba caya na e momentonan aki buscando confirmacion di tur detayes relaciona cu e detencionnan relampago aki.