Diamars anochi, den e programa “Pasco na Cas”, Minister di Cultura, mr. Xiomara Maduro a sorprende Ruben ‘Scorpio’ Garcia cu un homenahe pa su 50 añanan den radiodifusion. A dedica un bunita raportahe na Ruben Garcia y na final di esaki Minister Maduro a presenta di sorpresa na cas di Ruben Garcia pa brind’e un homenahe.
Den presencia di su señora, Treesje Garcia, yiunan, nuero y nietonan, Minister Maduro a entrega Ruben un plakkaat, gradiciendo Ruben pa e bunita trabou haci e ultimo 50 añanan den trece entretenimento, alegria y informacion via radio den hogarnan di nos isla. Specialmente den e temporada di fin di aña, como tambe carnaval, semper Ruben Garcia ta hopi scucha na radio y mira na television, den mayoria casnan di nos isla.
Ruben “Scorpio” (68) Garcia a inicia su carera radial dia 1 di juni 1970 na Radio Kelkboom, despues Voz di Aruba AM na 1976 y sigui pa Canal 90FM na 1989. El a muda pa Magic FM na aña 2002 y finalmente a bira Gerente General di Power FM. Ey e tin su programa radial ainda mainta y su programa asina popular riba diadomingo. Desde aña 1982 e tabata promotor y ya pa hopi aña caba a stop pa dedica unicamente na radio y television. E show di mas grandi cu el a yega di organisa tabata e concierto di UB40 den Aruba Entertainment Center na September 1994. Ruben Garcia ta casa cu Theresa y ta tata di dos yiu muhe y tin 2 nieto.
Ruben ta un eminencia den radiodifusion y ta domina cualkier tarima miho cu tur hende. Minister Xiomara Maduro a gradici Ruben tambe pa e guia cu el a sa di brinda otro locutornan y ta spera cu Dios por brinda bida y salud pa Ruben por keda deleita Pueblo di Aruba cu su programanan yena di alegria via frecuencia modula. Masha danki Ruben!
