E ta un psicologo di profesion, tabata vincula den e wega di placa di Karatbars y ta politico di partido PPA/UPP den e ultimo eleccion. Dimitri di Carlo awo tin un sentencia di dos aña di prizon ta colga riba su cabes, acusa di ta un pedofiel. Dia 20 di november proximo hues lo dicta sentencia den e caso penal contra dje
E aña’ki casonan di abuso sexual of actonan di inmoralidad cu menor y hasta cu pashent a capta atencion y hopi denuncia na Aruba. Tur esaki ta mustra con alarmante e situacion ta. Casonan cu antes ta keda tapa, awo ta bini dilanti. Den tur e denuncianan haci, tabatin e caso di un profesional di cuido contra kende a haci denuncia di actonan inmoralidad cometi cu un mucha homber cu tabata biba cerca dje hunto cu e mama. E denuncia aki a yega te den Corte y awo ta en espera kico ta e decision di Corte.
Fiscal a presenta diferente declaracion y otro pruebanan contra psicologo Dimitrius “Dimitri” di Carlo, pa a mishi cu e mucha homber di 15 aña. Un hecho cu a tuma luga dia 15 di mei den un apartamento. E mama a dicidi di entrega keho despues cu e yiu a cont’e loke cu a pasa asina cu el a yega cas. E mama y su yiu a bay biba cerca e homber, kende ta un psicologo y ta bon conoci den comunidad. E apartamento ta consisti di dos camber. E mama y e yiu tabata drumi den un camber y nunca a pensa cu algo asina lo sosode, mirando cu nan ta traha hunto den e lucha contra tipo di caso asina.
E hecho a tuma luga na momento cu e mama a bay traha, e psicologo a drenta e camber y a cuminsa caricia e hoben di 15 aña, kende a rechasa e acto, pero el a keda hunga cu ne te ora cu e mucha homber a keda cla y despues a sali bay. E hoben a compronde cu e cos aki no ta normal y asina cu e mama a yega, el a conta tur loke cu a pasa.
Dimitri a yora y brasa e mama pidiendo disculpa y pa no bay conta nada na ningun hende. Sinembargo e mama a bisa cu e no ta den e bagamunderianan aki, pio cu ta su yiu a bira victima di abuso di e homber aki y a sali bay Polis. E acusado a nenga tanto na polis y na hues, di a comete un hecho asina aki. Si e ta admiti cu e tabata den e camber. El a drenta den e camber, net na momento cu e hoben tabata hunga cu su mes y a keda cla. “El a spanta y a pidi mi pa no conta su mama loke mi a mira. Si mi a bay busca wipes pa e limpia su mes.”
El a keda para’riba cu e no a haci nada indebido pa motibo cu e bentanan di e apartamento ta habri y su amigo tabata na cas. Solamente el a bay den e camber di e hoben pa mustr’e un premio cu el a gana. E hoben di su banda ta bisa esaki no ta berdad. E no tabata hunga cu su mes pero tabata drumi riba cama si cu su celular den man y ta wak cosnan riba Facebook. E hoben a bisa cu Dimitri a keda casi mey ora den e camber. Y ta berdad cu Dimitri a trece wipes p’e, pero despues cu el a hunga cu ne y a lague keda cla. Hasta e homber a lembe e sperma despues.
Durante tratamento di e caso a cuestiona declaracion di e pareha di Dimitri. Prome el a bisa di a mira su amigo cay na rudia y pidi pordon na mama di e hoben, pero diripiente, despues di a bishita Dimitri den KIA, el a cambia su declaracion. Pero tambe e ta bisa algo diferente, cu e mucha a spanta pasobra a hay’e ta wak porno y no cu e tabata hunga cu su mes.
E abogado mr. Peter Mohammed a asisti e acusado huridicamente den e caso aki. Un abogado mester percura cu ta cumpli cu tur rekisito di ley den caso di su cliente. Den e caso aki, e ta haya cu hues mester mira cu tin dos declaracion so. Un di e victima cu ta bisa algo y e otro di e sospechoso cu ta nenga. Tin denuncia di e mama, pero e mama no tabata presente y ta basa su mes riba e yiu a cont’e.
Den casonan asina, mester tin prueba di sosten (apoyo), locual no tin awo. Den casonan asina no por condena un persona. Menos e dos aña pidi door di Ministerio Publico. E castigo pidi tabata 24 luna, di cual 2 luna ta condicional y tres aña di prueba. Na momento di duna castigo, e dianan cu e persona a keda cera, si hay’e culpabel, ta wordo kita for di e tempo cu e mester bay cera. Dia 20 di november awo lo tin sentencia.
