Casi un luna a pasa caba cu Minister di Salubridad Publico, Dangui Oduber, a anuncia cu e proceso di destaho publico a cuminsa pa otorgamento di permisonan na negoshinan pa cu cultivacion y procesamento di cannabis cu proposito medicinal. Originalmente e ultimo dia cu por a registra tabata dia 16 di februari pero a extende e fecha. Awor pa e fecha nobo ta dia 26 di februari 2021. Automaticamente door di e extencion di e fecha, mester a adapta e timeline tambe di henter e proceso.
Gobierno di Aruba tin intencion di solicita e proposicionnan di e companianan cu ta interesa den sea cultivacion y/of procesamento di cannabis medicinal na Aruba. Pa di e manera aki ta cuminsa encamina e proceso supervisa pa e ‘Commissie Gunning Ontheffing Medicinale Cannabis’ cu ta apoya Gobierno di Aruba den esaki.
Tin 3 sorto di RFP cu e aplicantenan por participa pe:
- RFP pa e cultivacion di cannabis pa proposito medicinal na Aruba
- RFP pa e procesamento di cannabis pa proposito medicinal na Aruba
- RFP pa e cultivacion y procesamento di cannabis pa proposito medicinal na Aruba
E cambionan den e agenda nobo pa cu e timeline ta lo siguiente:
- E proceso di e 3 sorto di RFP lo ehecuta paralelo cu otro y cada un di nan lo tene nan mes na e timeline menciona abou.
- E registracion pa participa na e RFP a cuminsa caba desde 22 di januari 2021 y lo termina riba 26 di februari 2021 pa 11:59 pm (UTC -4).
- Despues di e dia y orario stipula no lo acepta ningun registro mas.
- Pa dia 1 di maart 2021 pa 6 pm (UTC -4) tur participante cu a keda registra lo ricibi e documentonan di e RFP cu ta aplicabel.
- Dia 12 di april 2021 pa 10:00 am (UTC -4) ta e deadline pa presenta un proposicion.
- E habrimento di e proposicionnan lo tuma luga e mesun dia 12 di april 2021 y lo cuminsa pa 10:01 am (UTC -4) den presencia di un notario.
- Lo divulga tur e proposicionnan cu a keda selecta di e (3) RFP dia 14 di mei 2021 pa 10:00 AM (UTC -4)
Pa mas informacion di con pa registra por subi e pagina web di BMCA cu ta www.bmca.aw
