EPB y SNBA a estrecha laso pa studiantenan

Educacion Profesional Basico (EPB) y San Nicolas Business Association (SNBA) a firma un acuerdo di cooperacion cu ta na beneficio di e hobennan di e instituto educativo aki, den nan preparacion pa subi mercado laboral. 

Durante e ceremonia tabata presente director Rensley Mathilda y Andres Hernandez, presidente di SNBA. Tambe un alumno di cada sector a representa e studiantenan di EPB.  “Boso ta e fundeshi pa sigui desaroya e area aki di San Nicolas,” e director a expresa durante e ceremonia na e hobennan.

Den e situacion actual ta hopi dificil pa studiantenan cu ta den ultimo aña haya chens of luga unda pa core stage. Aki ta caminda cu SNBA ta bay duna un man. Pero tambe pafo di Aruba cu tin negoshinan interesa pa tin hobennan cu ta siña conoce e diferente areanan di mercado laboral prome cu nan finalisa nan estudio.

EPB y SNBA a estrecha laso pa studiantenan

EPB y SNBA a estrecha laso pa studiantenan. Click e link pa mas http://24ora.news/3blRXrR

Posted by 24ora on Thursday, February 18, 2021

Den cuadro di esaki, Hernandez a mustra riba un proyecto grandi cu ta den desaroyo, esta Secrets of Baby Beach cu cual SNBA a cera un compromiso caba, cu sigur 6 pa 7% di e personal ta studiantenan di EPB. “Mi ta wak un bunita futuro,” Hernandez a bisa. 

Diane Lejuez de Cuba, di Stichting EPB, a bisa cu “e momentonan aki ta un di esnan faborito di mi trabou. Firmando e acuerdo aki, cada partido ta compromete su mes den yuda forma e futuro generacion di nos profesionalnan. Den e acuerdo aki ta ganado so ta bay tin, principalmente e studiantenan. Nan ta bay haya oportunidadnan pa core stage, di kico ta spera di nan ora cu drenta mercado laboral. E ta habri porta pa futuro pa e hobennan aki. Mi ta hopi contento cu e acuerdo aki.”

Durante un aña a negocia e acuerdo aki cu e diferente instancia y partidonan envolvi.