Awe tardi hues-comisario a aproba peticion di fiscal di Ministerio Publico pa prolonga detencion di Maria Leoncita Arends cu un maximo di 8 dia mas. Dia 13 di april a detene na su cas mainta y el a keda 10 dia den ward’i polis. Dia 23 di april a prolong’e pa 8 dia mas y a mand’e KIA.
Ayera dia 3 di mei a pidi su prolongacion pero awe hues-comisario a bay di acuerdo cu peticion di e fiscal pa e keda 8 dia mas, pendiente e investigacion cu ta andando.
Ministerio Publico ta acusando Leoncita Arends di falsificacion, esta “valsheid in geschrifte”. Y pa evita cu e ta influencia testigonan, a pidi pa mantene encarcela por lo pronto. Abogado mr. Doris Canwoood ta encarga cu defensa di Leoncita Arends
Mester menciona cu a detene su yiu muhe prome, Rebecca Richardson y despues Jeff Franken. Ambos ta den libertad caba. A detene Gaby Werleman y su casa Nina, cu tambe a recobra nan libertad. Despues a detene Franklin Abath cu tabata den management team di DIP tempo di AVP. Awor aki, de facto, ta solamente Arends y Abath ta cera keto bay.
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
