Awe marduga pa mas o menos 1:00am a sosode un accidente ora un auto shinishi, maneha pa un dama biniendo for di Marriott, bayendo Palm Beach, birando na man robez na e luznan di trafico. El a dal den trafico contrario, un auto color cora, tambe maneha pa un dama, biniendo di Super Food, direccion Palm Beach.
Dado momento e auto shinishi no a para pa duna preferencia na e auto color cora door di a sali su dilanti. E sla riba e auto shinishi tabata casi nada, pero e auto cora si a haya basta daño. E auto shinishi na su turno a sigui core bay.
A sigui un persecucion, un otro auto particular a sigui e auto y a avisa Polis mesora, cu na su turno a avisa patruyanan y asina a intercepta e auto aki den Playa.
Polis a par’e y a haci un test di alcohol, cu a sali malo pa e dama chauffeur, kende tabata bao di influencia di alcohol. A deten’e y hib’e Warda di Polis na Shaba pa investigacion.
Mientrastanto Polis a sigui cu e investigacion na e sitio. A gradici e chauffeur di buena fe, cu a sigui e auto aki cu awo por sa ken a dal e otro auto. E chauffeur di e auto tabata hopi contento ora cu el a haya sa cu nan a logra localisa e otro auto cu a dal riba dje.
