Parlamento riba 26 di novèmber 2018 a trata kambio di Buki 2 di Kódigo Sivil Kòrsou. E intenshon di e kambio aki ta pa trese mas transparensia den e lei di 2011 i asina aki kumpli ku kriterionan mundial entre otro di e Organisashon pa Koperashon Ekonómiko i Desaroyo (OECD) i Taskforce Akshon Finansiero (FATF)
Kada 7 aña e lei a wòrdu revisá. Un komishon, ku ta konsistí di miembro di diferente gremio a tuma 4 aña pa trese e proposishon, lokual ku dia 28 di ougùstùs 2018 a keda entregá na Parlamento di Kòrsou.
Frakshon di PAR den Parlamento tabatin vários pregunta riba e konsepto di lei Buki 2 di Kódigo Sivil Kòrsou entre otro:
1. Protekshon di privasidat di akshonista:
Na momento ku instalá un registro di akshonista ku ta risibí dividendo ta importante pa kuida e informashon aki. Den kuadro di esaki a puntra ken lo tin akseso na e informashon i kua ta e sanshonnan pa malusá e registro aki.
- Duna akshonista nan sufisiente tempu pa kambia akshon na nòmber:
Awor ku ta introdusí ku tur akshon mester ta na nòmber, ta importante pa duna akshonista informashon i tempu pa kambia esaki nan. Den kuadro di esaki a puntra kuantu tempu un akshonista lo tin pa hasi e kambio nan nesesario.
- Inkluí un artíkulo di evaluashon:
A tuma nota ku e konsepto di lei no tin un periodo di evaluashon. Mirando e desaroyonan rondó di OECD, FATF i rònt mundu, ta importante pa tin un artíkulo ku ta regla un periodo di evaluashon i ku no mester warda te ku 7 aña pasa pa hasi e adaptashonnan. Den kuadro di esaki petishon di pa inkluí un artíkulo ku un periodo di evaluashon.
Teniendo kuenta e punto nan di atenshon frakshon di PAR a vota pa un relato preliminar pa asina por haña e informashonnan i dokumentashon nesesario pa sigui traha riba e lei.
