Candela devastado a kima apartamento por completo awe mainta na Palm Beach. Brandweer a yega pa domina e situacion pero no por a salba nada mas.
Masha lamentabel pa wak con un candela ta caba cu tur e sacrificio y inversion di un cuidadano cu apenas a caba di renoba e vivienda pa un persona huur esaki. E incidente a tuma luga un poco despues di 9:00 am na Palm Beach 258, ora cu un persona encarga (of propietario) a bin cende airco den a apartament en espera di e huurdo.
Den e proceso, e airco a kortsluit, cay riba e cama y cende candela, ta indicacion cu a haya na sitio cu por tabata e causante. Lamentabel cu tin cu bisa cu e destruccion ta total, practicamente tur cos a kima. Na sitio a presenta dos truck di brandweer cu a haci nan maximo esfuerso pero na yegada e candela a haci e daño caba.
Un rato despues, cu un situacion bou di control, e bomberonan a bandona sitio. Un investigacion ta na su luga pa saca afo con e incidente aki realmente por a socode y si ta eror humano y/of electrico di fabrica.
