Awe riba dia Internacional di Hipertension, ministernan di Gabinete Wever-Croes a uni nan mes na e campaña ‘Conoce bo Number’ di Departamento di Salud Publico Aruba (DVG) hunto cu IBISA. Un programa di salud cu ta basa riba prevencion di consecuencianan medico cu por surgi di presion halto si un persona no ricibi tratamento.
Diamars mainta, Ministerio di Salubridad, a organisa un dia special na Bestuurskantoor pa duna Ministernan y empleadonan di e oportunidad pa pasa check nan presion.
Dokter Gerrit Croes y señora Dahariana Evertsz di Health Promotions a tuma presion di ministernan. A check presion di tur mandatario, pues tambe di minister-president. Su mesun colega di partido, dokter Gerrit Croes, ex-presidente di partido MEP, a check su presion p’e.
Premier ta contento cu el a “Conoce su Numbernan” cu ta 110-80 cu ta un indicacion cu nos Prome Minister ta bon di salud pa loke ta trata presion.
Prome Minister ta haci un yamada na cada ciudadano pa ta consciente di su number y check presion debidamente. “Ta importante pa nos check nos presion y sa e numbernan di nos presion pa asina keda gosa di un bida saludabel”, Prome Minister a enfatisa.
