E sindicatonan SIWA y sindicato di e profesionalnan di WEB a presenta na parlamento pa un reunion cu porta cera. E sindicatonan a reacciona riba e parti di landspakket norm inkomen no unicamente ta bay afecta director, pero lo afecta tur hende te na e bode na WEB. Esaki lo tin consecuencia riba nan salario den e periodo cu ta bin.
mr. Mike Eman, Lider di fraccion AVP, a indica cu Raad van Advies ariba e ley di Topinkomens ta mustra riba locual ta yama e neveneffecten (efectonan secundario). Segun e parlamentario, en berdad e ley ta regarda e top. Pero e top ta bay haya un reduccion. Ora cu e reduccion bin p’e top, esunnan bou di dje tambe ta bay mira e consecuencia.
Locual ta importante pa pais Aruba n’e momentonan aki, di cual awo tur hende ta bay realisa, ta ora cu a bin cu e landspakket y COHO tabatin un ambiente na Aruba caminda cu tabata bisa ta bon pa bay controla gobierno, controla politico, nan no a maneha e pais manera mester ta. Eman a bisa cu hopi hende no a realisa cu landenpakket no tin nada cuent’i controla gobernantenan. Loke landenpakket ta e ponencia y posicion di parti di gobierno di Aruba y Hulanda a acorda parti con ta bay paga e ciudadanonan. Ken ta haya cua salario aki na Aruba, con ta bay kita placa di sector medico na Aruba, kita placa di e maestronan.
Tur e reglanan cu tin den e landspakket ta basa beneden waarde nivellering. A bisa cu e nivel di bida di Aruba ta demasiado halto compara den region y ta bay baha tur cos na nivel di averahe di region. Esey ta significa, segun Eman, cu nos hende no ta bay haya remedi mas, tin di bay paga ora di bay dokter, paga ora di bay specialista. Esey no ta e vision cu AVP tin pa Aruba. Eman ta kere cu mester bay bek na mesa, dialogo interno di e pais. Loke a resalta den e dianan aki, no tabatin dialogo y awe e sindicatonan ta duna nan opinion pa prome biaha.
Pa mas lesa TREMPAN.COM.
