Stichting Katholiek Onderwijs Aruba (SKOA) a manda informa Parlamento di Aruba di nan intencion pa adapta e tarifa di aporte anual di mayornan, conoci como “schoolgeld”, entrante e aña escolar nobo. E proposicion cu tin awor riba mesa ta pa aumenta e tarifa di 175 florin pa alumnonan di kleuterschool y basisschool pa 585 florin pa aña. Pa alumnonan cu ta bay MAVO lo hisa e tarifa for di 250 florin pa 635 florin pa aña. “E medida aki ta necesario pasobra gobierno no ta subsidia e salario completo mas di e personal di limpiesa na scolnan. Y como cu nos kier garantisa scolnan limpi y sigur pa un bon ambiente di trabou y pa studia, no ta keda nos otro opcion awo”, asina Anuesca Baly, director di SKOA, a skirbi den su carta dirigi na tur fraccion den Parlamento.
Desde januari 2020, Gobierno di Aruba ta retene un averahe di Afl. 150.000 tur luna for di e subsidio cu ta duna na salario di e werksternan. Pa aña e ta representa mas of menos 1,8 miyon florin! Riba dje, Gobierno ta atrasa cu subsidio na SKOA for di dos aña caba, cu ta un suma cuantioso di 4 miyon florin. Pa por yena e buraco cu a presenta awo den e presupuesto di SKOA, ta necesario pa por hisa e schoolgeld cu mayornan ta aporta cu ne anualmente.
Ta bon pa realisa cu no menos di 85% di tur studiante ateniendo kleuterschool, basisschool of un MAVO na Aruba, ta atendiendo na un di e 46 scolnan di SKOA. E medida aki, sin ningun duda, lo ta un peso financiero grandi pa hopi mayor. P’esey mes SKOA a haci un peticion dramatico riba nos representantenan di pueblo pa tira un bon bista riba e urgencia di e situacion aki y studia e hechonan bon.
SKOA a bisa acerca cu e manera con ta subsidia e personal di limpiesa na scolnan ta un escogencia politico. E decision tabata di ex-Minister di Enseñansa y Famia Michelle Hooyboer na aña 2015. E tempo ey Directie Onderwijs a manda un email pa SKOA cu e peticion pa inclui e personal di limpiesa den e lista di trahadonan na Directie Financien paga nan salario. Cuater aña despues, na aña 2020, Minister di Educacion, Ciencia y Desaroyo Sostenibel Rudy Lampe a keha SKOA di a maneha contra ley. Pa esaki, mester ta bon cla cu Directie Onderwijs ta resorta directamente bou di Minister di Enseñansa. Prome cu paga salario, SKOA ta manda su lista pa control y revision di Direcie Onderwijs y Directie Financien. For di maart 2016 pa december 2019, a haci un peticion asina y a haya aprobacion di ambos deparamento pa un total di 46 biaha!
SKOA a reuni cu representantenan di Gobierno na mas di un ocasion, pa purba yega na un solucion pa e problema aki, pero sin mucho resultado. Dos dia prome cu eleccion, dia 23 di juni 2021, a drenta un carta firma pa minister-president den cual ta urgi SKOA pa no kita ningun werkster for di trabou pasobra cu Gobierno lo soluciona e problema basa e conseho duna door di CORS, Commissie Oplossing Rechtspositie SKOA-werksters, bou di e direccion di e Mediador di Gobierno. E conseho mes a wordo firma door di representantenan di Ministerio di Asuntonan Social y Labor y di sindicato SEPPA. Te dia di awe, a pesar di varios carta di SKOA, ainda Gobierno no a cumpli cu locual a skirbi den nan carta.
No obstante e falta di contesta di Gobierno, asina mes SKOA a opta pa duna e Minister nobo di Enseñansa y Deporte, Endy Croes, espacio pa purba soluciona e problema aki. El a lanta un comision, Commissie voor de Oplossing van her Problematiek rondom de Werksters van de SKOA, COPWS, cu tabatin como tarea pa den 30 dia bin cu un solucion. Te awe e comision no a logra yega na un conseho unanime. SKOA a manda carta pa secretario di e comision na november y na december 2021, pero te awe no a haya ni contesta. P’esey SKOA ta bek wardando implementacion di e Advies CORS.
Mientrastanto, teniendo na cuenta cu mester habri inscripcion pa e aña escolar nobo 2022-2023, no ta resta otro opcion cu adapta e tarifanan di schoolgeld pa e aña escolar nobo.
Frere Bonifacius a funda Stichting Katholiek Onderwijs Aruba (SKOA) na januari 1971. E fundacion ta manehando 46 scol, parti den 15 kleuterschool, 25 basisschool, 5 MAVO y 1 scol special. Na tur nan tin 600 docente den servicio, mas 150 empleado pa brinda enseñanza na 9500 alumno. Na oficina di SKOA mes tin 20 empleado den servicio.
