Conforme e trabounan haci den cuadro di Landspakket, dia 12 di augustus Conseho di Minister di Aruba a aproba recomendacionnan haci durante investigacion di funcionamento di Departamento di Finansa y Central Accountants Dienst CAD. Esaki a base di conseho ricibi di e expertonan di Improven, den colaboracion cu Grant Thornton Aruba cu a haci e investigacion aki.
E meta principal di investigacion tabata pa evalua e posicion y funcionamento actual di departamentonan en cuestion y haya miho bista di paso specifico cu lo mester tuma pa mehora esakinan. Asina creando un base firme pa yega na un maneho financiero duradero pa Pais Aruba. E investigacion a wordo haci den cuadro di e Landspakket tema A | Punto A.1.2.5-, doorlichting DF y punto A.1.3.2-, roadmap.
𝘗𝘶𝘯𝘵𝘰𝘯𝘢𝘯 𝘱𝘢 𝘮𝘦𝘩𝘰𝘳𝘢
Puntonan di mehoracion cu a resalta durante e investigacion ta (1) e necesidad di crea proceso presupuestario coherente, (2) e necesidad pa Pais Aruba por tin cuenta anual controla, (3) e necesidad pa Pais Aruba tin un maneho dirigi riba eficiencia y resultado, (4) e necesidad di automatisacion di proceso y (5) e importancia di cambio di cultura interno. Adicionalmente por menciona cu algun conclusion haci durante e investigacion ta, entre otro, cu lo mester reforsa posicion di Departamento di Finansa como tambe di CAD unda cu ambos departamento lo tin un papel mas estrecho pa locual ta coordinacion y supervision di e proceso financiero di Pais Aruba.
E investigacion tambe a revela cu mester introduci un asina yama modelo ‘ three lines of defense’ unda cu ta haci un division entre (1) proceso primario, (2) control interno y conseho, (3) control externo. E investigacion tambe a revela e importancia di diseña proceso relaciona cu maneho financiero interno nobo como tambe apunta personanan dedica pa cada proceso (proces eigenaren).
𝘊𝘰𝘯𝘴𝘦𝘩𝘰 𝘥𝘪 𝘔𝘪𝘯𝘪𝘴𝘵𝘦𝘳 𝘢 𝘢𝘱𝘳𝘰𝘣𝘢 𝘶𝘯 𝘊𝘶𝘢𝘥𝘳𝘰 𝘥𝘪 𝘈𝘤𝘤𝘪𝘰𝘯 𝘱𝘢 𝘮𝘦𝘩𝘰𝘳𝘢𝘤𝘪𝘰𝘯
Recientemente Conseho di Minister a aproba un asina yama Cuadro di Accion (roadmap) specificamente relaciona cu cambio cu lo tuma luga den e proceso presupuestario como tambe e maneho financiero. Conhuntamente cu expertonan di ministerio di Asuntonan di Reino BZK, Pais Aruba a crea un cuadro di accion cu ta cana te cu aña 2027. E cuadro di accion ta describi e pasonan cu mester tuma pa asina por yega na un maneho financiero y presupuestario duradero. E cuadro di accion tambe tin como meta pa integra tur reforma cu ta menciona den e Landspakket pa asina crea un bista integral di nan efecto colectivo pa maneho presupuestario di nos Pais. Di e forma aki tambe ta promove eficiencia ora ta trata e reformanan cu Pais Aruba ta implementando.
𝘜𝘯 𝘱𝘢𝘴𝘰 𝘮𝘢𝘴 𝘤𝘦𝘳𝘤𝘢
Minister Maduro ta gradici Improven, Grant Thornton y tur e profesionalnan di Departamento di Finansa y CAD pa e trabao importante aki. Esaki ta un paso importante pa por yega na un maneho financiero duradero y resiliente pa Aruba, conforme e vision di Gabinete Wever-Croes. Aruba ta traha na un manera serio pa por cumpli cu e palabracionnan haci den cuadro di e Landspakket y e Cuadro di Accion ta mustra e caminda pa cana e tempo nos dilanti. Una bes cu incorpora e cambionan proponi, Aruba lo por yega na un ‘goedkeurende controleverklaring’ na aña 2026.
