Aunke hopi hende no ta kere pero bo forma di bisti ta indentifica bo, e por gaña bo, e por duna otro hende un impresion negativo di bo pasobra bistimento semper mester keda den un forma decente, cu ta representa bo personalidad cu seriedad. Dunando gloria na nos Creador.
Laga nos pone e cos cla manera e mester ta: Ora un hoben/hobencita ta cana indecente bisti ta su mayornan mester dun’e educacion tocante bistimento, y no dun’e solamente placa pa cumpra paña pero tambe siñ’e kico ta adecuado pa bisti, como yiu di hende drechi y decente.
Si un muhe ta cana hunto cu un homber y e ta indecente bisti, por nifica cu e homber no ta balora locual cu e tin, pasobra ningun caminda bo no ta haya diamanta riba tera, of e muher no ta somete na e homber, of nan ta kere mas den moda cu den Dios, etc.
Tambe tin awor e show di tattoo, pasobra un tattoo no ta wordo poni na un hende su curpa pa e wordo scondi, pasobra ta placa tira afo, awor tin hopi hende ta pone tattoo na lugarnan priva y despues ta expone e parti priva ey di nan curpa pa tur hende por mira nan tattoo. Y nan ta haci esaki conscientemente, locual ta indica e deseo di exposicion. Asina e enemigo ta tuma control.
Corda tene cuenta cu nos curpa ta e tempel di Dios y e Spirito di Dios ta biba den dje. (1Corintionan 6 :19+20)
Nos por haci hopi cambio na e parti exterior di nos curpa, pero e parti interior ta solamente Dios por cambi’e, y mas awor cu henter mundo por realisa cuanto balor mente y curason di hende tin, y con e enemigo ta ataca e mente y e curason constantemente pa asina cohe e dominio riba e bida.
Tene bon cuenta cu e siguiente advertencia y recomendacion.;
Efesionan 4:22-24 ta bisa: Pa encuanto boso manera di biba di antes,boso pone un banda e hende bieu cu ta wordo corumpi conforme e pasionnan engañoso.
Y pa boso wordo renoba den e spirito di boso mente, y pa boso bisti e hende nobo,cu ta wordo crea segun Dios den husticia y santidad berdadero.
Romanos 13:13+14 ta bisa: Laga nos comporta nos mes decentemente manera den dia, no den parandiamento y den buracheria, no den inmoralidad sexual y den sensualidad, no den pleito y envidia. Ma bisti boso cu Señor Hesus Cristo, y no haci provision pa e carni, pa cumpli cu su mal deseonan.
Colosensenan 3 vers 8-12 ta bisa: Ma awor boso mester pone un banda, rabia, furia, malisia,calumnia, y palabra sushi for di boso boca.
No gaña otro, como boso a pone un banda e hende bieu cu su practicanan malbaldo.
Y bisti e hende nobo cu ta wordo renoba cu un conocemento berdadero segun e imagen di Esun cu a crea, cual ta Dios.
Asina manera esnan cu a wordo scogi di Dios, santo y stima,bisti un curason di compasion,cariño, humildad,mansedumbre y pasenshi.
Dios ta traha paden di nos cu Su Spirito Santo, y asina nos por expresa Su boluntad den nos bida.
Tur cambio , cual ta hiba na desencia y ordo den nos bida spiritual y fisico ta cuminsa paden, pasobra manera un hende ta pensa asina e ta.
Asina nos pensamento y nos curason wordo renoba nos bida ta cambia, pero nos mester habri nos curason pa Cristo Hesus tuma control , y asina conoce Su boluntad perfecto.
Sinceramente, Pastor Marcel Balootje.
