Ordo a bin di ariba, segun fuentenan den DOW mes, pa kita e borchi di “I Love Aruba” for di dilanti Bestuurskantoor riba L.G. Smith Boulevard. E conocido comerciante Omar Steve Lejuez no tabata disponibel pa duna un comentario riba e decision contra su borchi. Parce cu ora Minister Otmar Oduber a dicidi di laga kita e sign, cu esaki a cay manera un baño di awa frieu. Ta un borchi cu tur dia algun shen turista ta para pa saca potret y manda esaki viral riba rednan social. Un promocion hopi grandi pa Aruba y un promocion gratis. Hendenan di tur parti di mundo cu yega Aruba ta para ey pa saca potret.
Desde cu a pone e borchi di propaganda eynan, Minister Otmar Oduber no a aprecia. E tempo aya tabata Mike Eman como Minister Presidente cu a duna OK pa pone. E tempo ey tabatin e disputa riba e logo di Aruba cu e compania cu tabata di Otmar Oduber y cu pa hopi aña via ATA ta encarga pa maneha e “branding” di nos pais.
Contrario na e sentimiento di Minister Oduber e tempo aya, e borchi a para bira un icono di Aruba, un promocion hopi mas grandi cu e logo cu e compania cu tabata di Otmar Oduber tabata maneha pa ATA.
Mientrastanto awor cu Otmar Oduber a anuncia su retiro, ta mustra cu e ta decidido pa finalisa algun guera bieu cu a keda pendiente. Un di nan ta cu famia Lejuez, kende mesora a envolvi abogado den e asunto. Ora e Minister a sinti e cayente, el a bisa cu nan lo laga pone na final di caya grandi. A tene varios reunion pa evita cu ta djis hisa e sign pone un otro caminda sin pasada di turista. Parce cu despues di deliberacion tog lo move e sign.
A acorda cu e borchi lo bay un otro area cu no ta na final di Caya Grandi. Segun e informante na DOW, e siman cu ta bin aki lo aloca e borchi na entrada di waf di crucero, na e Welcome Plaza.
E motibo oficial di e decision pa move e sign no ta conoci. Ta specula cu e Minister lo kier pone su mesun logo eynan pasobra desde cu Mike Eman a laga instala e borchi di “I Love Aruba” eynan, cu e otro logo a perde popularidad. E vision di e politiconan no tabata mesun cos; Un kier a promove Aruba y e otro ta comercialisa y gana placa cu e imagen di nos mesun pais.
