Si! Sanger ta esencial pa nos curpa. E ta e transporte di oxigeno, hormona, dioxido di carbono y nutrientenan. Tambe e ta proteha nos contra patogenos (esta bacteria, virus, schimmel of otro micro organismo cu por haci nos malo), e ta regula e temperatura di nos curpa y por yuda stop sangramento. Transfusion di sanger of transfusion di algun componente di sanger ta necesario pa diferente motibo.
Bo por imagina bo cu tin casonan unda por ehempel e pashent a haya un accident y a perde un gran cantidad di sanger, un mama ta perde hopi sanger ora di un parto complica of pashent ta haya operacion y tin mester di sanger. Y asina tin hopi mas ehempel cu por menciona unda e pashent tin mester di sanger.
Anualmente alrededor di 2500 persona na Aruba tin mester di haya sanger. Pa tin sanger disponibel, e ta importante pa keda ricibi donacion di sanger. P’esey AZV ta haci un yamada na comunidad di Aruba pa haci donacion y asina yuda nos banco di sanger, esta Bloedbank Aruba. Cerca nan bo por solicita pa bira un donante di sanger. E criterianan pa bira un donante ta cu bo mester ta entre18 y 65 aña di edad, cu bo ta dicidi boluntariamente pa bira un donante y cu bo ta dispuesto pa pasa den e proceso di screening y saminacion di Bloedbank Aruba.
Algun factornan cu ta haci cu bo no por bira un donante di sanger ta: si bo a yega di haya un CVA of si bo tin problema di curason, si bo ta spuit insulina pa suco, si bo ta hiba un bida sexual iresponsabel y si actualmente bo ta uza droga. Si bo ta interesa pa bira un donante di sanger, AZV ta invita bo pa yama Bloedbank Aruba na 5870002.
