“E no a keda contento cu nos Press Release”, asina un fuente den Camara di Comercio y Industria a sigura na nos ayera, despues cu a bira conoci cu Randall Croes a dicidi di retira for di e Directiva di Camara di Comercio. E ta den su di tres aٌa y su termino lo a vence fin di aٌa, pero a opta pa retira mesora, entrante dia 1 di october caba.
Te cu e siman aki ainda a mire na dos ocasion den conferencia di prensa y den reunion cu Minister Xiomara Maduro, relaciona cu e asunto di inclui BBO-BAZV-BAVP riba recibo. Ayera merdia a prepara un relato pa prensa, den cual e organisacion ta vocifera nan pensamento riba e cambio di maneho aki. Pero e miembro specifico aki di Directiva lo a prefera pa e relato ta un poco diferente, probablemente mas skerpi y cu mas detaye. Den e directiva di 9 miembro, no tur ora ta haya rason den tur asunto y como cu e ta un proceso democratico, ta mayoria ta conta.
Camara di Comercio for di algun tempo atras caba ta purbando pa convence Minister Xiomara Maduro cu e decision cu e kier tuma lo tin repercucion y gastonan innecesario pa comercio. A conseha e mandatario pa pensa e asunto bon y reconsidera su decision. No obstante e conseho di e comerciantenan, toch e Minister a opta pa cana su mesun caminda y sigui cu su plan, den cual ta obliga comercio pa hinca e impuestonan den nan prijs. Si nan kier nan por menciona riba e recibo cua parti ta impuesto, pero no por separa e sumanan riba e recibo.
Randall Croes ta un Economista y desde aٌña 2012 ta Gerente General di Sagicor Life. Den pasado e tabata traha masha cerca di Prome Minister Henny Eman como consehero. Despues el a opta pa drenta politica y a uni na partido Democracia Real di Andin Bikker. Hopi biaha Croes sa comenta riba situacion economico di nos pais, siendo un economista reconoci. Den Camara di Comercio ultimo tempo el a yega di vocifera su opinion na varios ocasion.
Ta obvio awor cu Randall Croes y e demas miembronan di directiva di Camara di Comercio no ta riba e mesun liٌa di pensamento relaciona cu e decision pa inclui BBO-BAZV-BAVP den prijs di tur producto y servicio. Como cu e mayoria a opta pa no bay tras di pensamento di e economista riba e tema aki, el a dicidi cu te aki tambe el a yega den Camara di Comercio y a opta pa retira mesora.
