Un rato pasa, recherchenan di Cuerpo Policial Aruba a yega na Lopez Satelites situa den Acropolis Plaza y a detene e conocido Radi Khan. E tin un negoshi di regla permiso di estadia y trabou pa stranhero. Por lo menos un di nan a keh’e di estafa, pues di a tuma nan placa sin regla nada pa nan.
Radi Khan di 48 aña di edad ta conoci debi na su rol como coordinador di ex-Minister Benny Sevinger, tempo cu e tabata encarga cu maneho di stranheria riba nos isla. Den e caso contra e ex-mandatario awo, Khan no ta meti, pero esey ta relaciona cu otorgamento di permiso. Despues di su funcion como coordinador, awo Khan a habri un oficina di regla permiso y cliente ta keha cu e no ta cumpli.
Cuerpo Policial a emiti un relato un rato pasa, den cual ta pidi pa si tin persona cu a duna e sospechoso aki placa pa supuestamente regla un permiso di estadia of pa permiso di trabou pa nan por pasa libremente na oficina di recherche Oranjestad ( DAR1) na Wayaca y entrega keho.
Mester menciona cu tin basta di e tipo di companianan asina, cu ta acesora stranheronan den asunto di permisologia. De facto, e servicio burocratico y lento den cual DIMAS ta funciona, ta pone cu stranheronan ta perde pasenshi y ta recori na un tramitado cu speransa cu esey por agilisa e proceso pa por yega na un permiso. Companianan tambe hopi bes ta man na cabes, pasobra DIMAS no ta contesta of negoshi mester habri pero no ta keda cla cu permiso pa trahado.
Na Camara di Comercio ta indica cu no mucho tempo pasa, esta dia 11 di februari 2022, a funda e compania Parceros Tramites y Consultoria y ta situa na Tanki Leendert # 241. E doño di e “eenmanszaak” aki ta pareha di Radi, esta Gilma Huertas, kende ta naci na Santa Marta, Colombia. Como apoderado di e compania ta parece Radighmyr Abdoel-Khan, naci na Corsou.
Ta den e cuadro aki y cu e compania recien lanta, un cliente ta sinti cu Khan a estafa nan door di tuma nan placa pa haci trabou di tramita permiso y no a cumpli. Esey ta zona hopi straño si pasobra den dos luna di tempo, e chens pa un permiso keda cla ta masha poco. Of e pareha Khan-Huertas lo a cuminsa tramita permiso prome cu nan a lanta e negoshi oficialmente y inscribi na Camara di Comercio.
Entretanto e caso ta bou di investigacion di polis y e echo cu fiscal a duna permiso pa detene Radi Khan, lo mester tin suficiente prueba of circunstancia pa husticia mira e necesidad pa deten’e y investig’e pa e acusacionnan di estafa contra dje.
