Esaki t’e pregunta cu ta haci e diferencia pa eternidad y e contesta ta hopi facil nos por lesa locual ta para skirbi den Echonan 16:30+31: “E wardado di preso a bisa: Señornan, kico mi mester haci pa ta salba. Y nan a bisa: Kere den Señor Hesus y lo bo ta salba, abo y e hendenan di bo cas.”
Ta deber di tur mayor di busca salbacion pa nan mes y guia nan yiunan riba e caminda di salbacion. Salbacion ta bin solamente pa medio di Hesucristo pasobra hende no por salba hende, ta Cristo a muri na cruz pa nos tur por ta salba.
Dios den su inmenso misericordia a duna oportunidad na henter mundo pa salbacion: Pasobra Dios a stima mundo asina tanto cu El a duna Su unico yiu, pa ken cu kere den dje no bay perdi, ma tin bida eterno.
Awendia hopi hende ta preocupa cu tur cos, menos cu nan salbacion.
Nan kier bienestar.
Nan kier paz.
Nan kier salud.
Nan kier tin un matrimonio feliz.
Nan kier tin yiu integro cu ta studia y gradua.
Nan kier placa.
Y un tremendo seguro di bida, pa ora nan fayece nan tin un entiero all out y hasta sobra placa.
Pero ke hubo di e alma, na unda e ta bay? Lo e tin bida eterno den shelo? Of lo e tin di bay den fierno?(Lucas 16:19-31).
Hende kier ta garantisa den tur cos, mescos cu ora nan cumpra un articulo den un tienda, nan ta puntra p’e garantia pasobra nan a saca placa y tur articulo den cas ta sigura.
Pero e garantia cu Dios ta duna di salbacion y bida eterno. Bo no tin mester di paga pe ni tampoco bo mester renoba, pasobra e no ta caduca, pasobra e prijs cu a paga na cruz di Calvario pa nos, t’e prijs di sanger di Cristo Hesus cu a drama pa nos picanan y cu hamas lo perde su poder.
Den E sanger di Cristo Hesus nos a redimi y ranca for di man di satanas, libera for di e mundo di scuridad y treci na luz. Ta p’esey awe nos por cana den Luz di Cristo , kende ta mantene nos riba e caminda di berdad y bida.
Tur mayor cu ta stima nan yiunan, mester guia nan den e caminda di Señor. Esey t’e prome amor di mayor y tambe e ta boluntad di Dios (Efesios 6:1-4) y tambe disciplina y coregi bo yiu, pasobra e mayor cu ta haci esey di berdad ta stima su yiu.
Mientras un hende ta na bida e mester ta interesa den su salbacion y biba pa Señor, pasobra despues cu e muri no por haci nada mas, pasobra salbacion ta personal: Si bo kere den bo curason y confesa cu bo boca cu Hesus ta Señor lo bo ta salba.
Cuanto hende awendia ta rechasa salbacion, pasobra nan ta kere cu ta religion, en bes di mir’e como un relacion intimo cu Dios, pasobra una bes bo ta salba nada por separa bo for di e amor di Cristo. Y ta keda na abo pa sigui persevera, pa ora Cristo bin busca su pueblo bo por bay cu ne.(1Thesalonisenses 4:13-18).
Tur hende den un hogar mester ta salba y biba pa Dios, pasobra esey ta boluntad di Dios. Marcel Balootje
