Un despedida hopi emocional di un persona hopi stima den comunidad pero mas cu tur den e mundo deportivo. Un gran amigo, un coach excepcional y un colega cu hopi pasion pa e deporte, ta palabranan di esunnan mas cerca di Gregory Manuel, cu awe a yega hunto pa rindi nan ultimo respet.
Teniendo na cuenta tur e reglanan di DVG a prepara un acto di despedida na Compleho Crismo Angela na Santa Cruz, pa asina tur por a rindi nan ultimo despedida conforme reglanan vigente. Acto di entiero a tuma luga for di 9:00AM te cu 12:00PM caminda e curpa di defunto tabata na Home plate pa e acto aki.
Mundo di baseball/softball sigur tabata den tristesa. Gregory Anthony Manuel tabata no solamente coach, manager pero un legendario y baluarte den mundo di deporte. El a dedica su bida na baseball y softball pa 36 aña largo.
Manuel ta naci dia 19 di december 1962 na Corsou y a fayece cu apenas 57 aña di edad. E tabata compaña cu Ruth Melfors. Nan tin 3 yiu homber, 1 yiu muher y 3 nieto. Desde cu el a bin Aruba, el a traha na Serlimar pero despues a bay traha na Santa Rosa. E tabata un pashent di cancer cu a perde bataya contra e enfermedad aki. El a fayece dia 27 di augustus pa 6:15am.
Gregory Manuel tabata manera un tata pa hopi mucha den baseball. E tabata e unico coach cu a yega cu su team pa participa den e World Series na 2010. E team cu e tabata dirigi a participa den Latino America na 2009, 2010 y 2011, unda Aruba a titula campeon.
Despues di despedida a sigui e acto di cremacion den seno di famia. Cu e defunto descansa na paz. Condolencia na tur cu e perdida aki.
