Awemainta Corte den Prome Instancia a dicta sentencia den e caso di “ontneming” contra di ex-minister Paul Croes y su casa Melony Croes-Paesch. Tratamento di e caso aki a tuma luga den luna di october unda cu Ministerio Publico a pidi pa declara ambos culpabel di tabatin placa ilicito. Fiscal a papia den caso di Paul Croes di un suma di mas di 200 mil florin y tambe a pidi pa pospone tratamento di e caso mirando cu Ministerio Publico y Paul Croes a bay casacion.
Awemainta e decision di Corte ta cu no ta pospone e tratamento sperando riba casacion pero ta dicta un sentencia. Corte a tene cuenta cu Melony Croes a haya ‘vrijspraak’ cerca Hof pa caso di labamento di placa y pa e motibo aki e demanda contra di Melony a resulta no admisibel.
Den e caso di Paul Croes a acepta e demanda, sinembargo Corte e rechasa e peticion di fiscal pa aumenta e suma cu Paul Croes mester paga na mas cu 200 mil florin. Paul Croes lo mester paga solamente e suma pa cual a hay’e culpabel di dje door di Hof cu ta un tiki mas cu 183 mil florin. Den palabra di Croes, e ta satisfecho cu locual hues a dicta riba e acusacionnan contra di su casa. Sigur un noticia alentador pa henter famia Croes y nan ta contento cu hues por a mira cu Melony Croes-Paesch no tabatin nada di haber cu e caso Ibis.
Despues d e decision aki Paul Croes a informa cu e lo apela esaki pero kico ta e posicion di Ministerio Publico, no ta conoci ainda. Otro casonan di ontneming cu a tuma den Caribe Hulandes tabata esun di Gerrit Schotte unda a papia di mas cu 2.5 miyon florin y Heyliger di St. Maarten unda a papia di un suma di 17 miyon dollar.
Pa loke ta e palabranan di Melony Croes-Paesch, e ta sumamente contento cu decision di hues awe mainta. El a enfatisa cu despues di a bringa casi cinco aña largo pa demostra, manera cu el a bisa desde prome dia, cu e no lo ta dispuesto pa paga “ni un cen preto” pa algo cu e no a haci. Awe pues e ta hopi contento cu e decision di hues.
Abogado defensor mr. Demis Illes a bisa cu pa loke ta e caso di Melony Croes-Paesch esaki tabata e miho scenario cu por tin y cu tabata spera esaki tambe. Ta contento cu esaki por reestablece tur duda cu e caso aki por a trece den Croes-Paesch. Mirando e resultado den su totalidad, pues incluyendo esun di Croes, a inicia cu un caso papiando di miyones y aworaki ta apenas alrededor di 180.000. No ta completamente satisfecho pero lo bay delibera si ta bay apela esun di Paul Croes.
Pa loke ta trata calculacion di e cifranan di Ministerio Publico, nan a uza e mesun cifranan cu a uza den caso Ibis. Pues, e mesun rapport financiero cu nan a uza pa sostene cierto ponencia den e caso penal ta locual a uza den e ontnemingszaak.
