Comision Accion Stop Abuso, hunto cu Fundacion Hende Muhe den Dificultad a yama un rueda di prensa ta cu nan kier, di parti di pueblo, pa pone presion pa implementa e plan di crisis, segun Marinus Weegereef. Awo ta bira e tempo pa bisa ta basta y implementa e plan di crisis. No di awe, sino for di ayera.
A tarda hopi pa tur instancia, por ehempel Fundacion Hende Muhe Den Dificultad, pa nan haya e hermentnan, polis haya nan tools, expande e Slachtofferhulp. Tin entendi cu tin dos hende so ta trahando den e servicio aki.
Ta straño cu ta mira un hende homber cu ta defende e parti contra abuso domestico. Weegereef, como hende homber e ta haya berguensa cu e personanan cu mayoria ta hende homber cu tin e curashi pa lanta un man pa un hende muhe of un mucha, p’e e ta un cobarde grandi. Ora cu a wak kico a pasa den e fin di siman cu a pasa un biaha mas, a perde un bida. Si nos tur a traha hunto, por ta e dama aki ainda lo ta canando na bida.
Weegereef a menciona cu nan como voz di pueblo, ta bisa cu kier drecha e parti aki, kier yuda gobierno. No tin un rason politico y tampoco no tin nada di haber cu religion. E tin di haber cu e ciudadanonan ta hopi preocupa pa loke ta pasando na Aruba.
Ta lamentabel loke a pasa y purba preveni pa no tin mas di e casonan aki. Desde di loke a pasa cu e dama, mientras tanto e kehonan ta drenta constantemente. Un hende homber tin problema. Pa lanta man pa un hende muhe of mucha, tin problema. E tin problema mental of problema cu droga, cu alcohol, cu cualkier cos. Busca yudansa, si ta asina. Pesey e plan di crisis ta importante pa por tin e departamentonan pa nan por yuda. Esey ta e parti cu kier.
Tin entendi cu diahuebs e sospechoso lo aparece dilanti hues. Ta pesey ta pidi pueblo pa bay bisti como protesta cu paña preto, mustrando cu Aruba ta na luto. Tambe nan lo bin cu un pagina riba Facebook, caminda pueblo por duna su sugerencia. Diahuebs lo bay duna e minister tambe e peticion di pueblo, pa asina cuminsa traha y implementa e plan pa caba.
Tin diferente accion, depende ki acuerdo Fundacion pa hende Muhe den Dificultad tin diahuebs cu minister. E accionnan lo bay cuminsa constantemente pa bisa cu for di dialuna, a laga sa ki accion lo tin. Lo bay sigui te ora cu mira e crisisplan funciona. Dia 30 di Augustus ta pidi un permiso, na unda cu na Plaza Alameda, kier organisa un evento grandi nacional, unda cu ta invita nos artistanan cu un programa. Esaki ta pa concientisa riba e problema y pa stop cu abuso di mucha y abuso domestico. Nos por, Aruba por, segun Weegereef.
