Polis tabata riba un alerta for di ayera nochi pa un caso di joyriding cu a tuma luga na Santa Cruz. A cuminsa un buskeda y polisnan rond Aruba tabata atento si acaso nan por a topa cu ne riba caminda.
Awe mainta den careda di 9:00 am a bin descubri e vehiculo aki na San Fuego (dilanti parcela San Fuego # 5-R) y mesora a pidi takelwagen pa transport’e pa ward’i polis. Investigacion tambe a cuminsa mesora pa busca paradero di e propietario y pa purba haya sa ken a horta e auto y sin nan por a horta piesa of haci mas daño na e vehiculo, cu ta parce den masha bon estado.
Informacion te awor ta cu a horta e vehiculo ayera nochi dilanti Rooi Bosal #66 aunke na prome instante a papia cu tabata dilanti Subway Santa Cruz caminda cu a cuminsa cu e buskeda. A haci un denuncia na Centro di Husticia y e doño lo tin cu presenta pa reclama su auto y asina saca afo kico por a tuma luga.
Claro cu prome cu esey polisnan forensico lo investiga e auto, check fingerprints y otro forma di prueba pa por mira si ta yega na e ladron envolvi den e caso aki. Tambe hopi biaha sa haci uzo di camaranan di siguridad den e area pa mira si por reconoce e ladron cu a horta e auto. Tambe mester check con a logra habri e porta di auto pa despues start e auto sin yabi. Ladronnan ta uza diferente tecnica y dependiendo na e forma di haci nan trabou, hopi biaha polisnan di “Joyriding-team” ta reconoce e ladron mesora.
