Recientemente a tuma luga entrega di decreto gubernamental na polisnan of empleadonan di Cuerpo Policial Aruba (civilnan tambe) cu a cumpli no menos cu 25, 30 y 35 aña di servicio. Tambe, durante e ceremonia a entrega promocion di polisnan, personal administrativo y personal tecnico di e cuerpo di polis. E evento a ceremonia luga na Centro di Husticia na Santa Cruz, den presencia di famia, colega y amigonan, cu a bin hunto pa e momento special aki di nan ser keri.
For di man di altocomisario suplente di Cuerpo Policial Aruba, Irma Gordon, a entrega promocion na e agentenan policial cu awo ta carga un rango mas halto.
Ta trata aki di agentenan cu a haya nan decreto pa bira Brigadier Eerste klasse: A.Grovell, L. Tromp y R. Koolman. Agentenan promovi pa Onderinspecteur eerste klasse: R. Lacle y R. Flounia cu tambe a cumpli 30 aña di servicio.
A promove e empleado civil di Cuerpo Policial Aruba, O. Werleman como Commies.
Alabes a cumpli 25 aña den servicio na Cuerpo Policial Aruba e polisnan P. Charles, E. Jacobs, S. Kelly, J. Tromp y G. Jansen.
Agente y personal administrativo cu a cumpli 30 aña den servicio na Cuerpo Policial Aruba ta E. Peternella, G. Oduber y M. Raphaela. Tambe M. Kock a cumpli 35 aña den servicio na Cuerpo Policial Aruba.
Mando Policial ta felicita cada polis y personal civil cu nan rango nobo. Esaki ta nifica cu e responsabilidad ta bira mas grandi pero no tin e duda cu e agentenan ta capaz pa cualkier eventualidad.
Na e personal administrativo cu ta e wes’i lomba di e organisacion, masha pabien! Ta mira nan esfuerso y dedicacion den e organisacion y ta aprecia esey.
Na tur e empleadonan cu a cumpli 25, 30 y 35 aña den Cuerpo Policial Aruba, ta yama nan danki pa e sosten, dedicacion, tempo y esfuerso cu a hiba nan asina leu den nan carera. Na tur a conta 280 aña di trabou, dedicacion y lealtad na sirbi nos pais.
