Un noticia lamentable caminda un persona a perde su bida den awa den area di Bushiri ta locual a drenta nos mesa di redaccion. Un rato pasa a tuma nota di autoridad presente na e area di ex- Bushiri Hotel caminda un persona lo a bati alarma pa un curpa cu tabata drif bay.
Esaki tabata den careda di 11:00 am ora cu un familiar a indica cu su tata lo a bay landa den e area y despues di un rato el a tuma nota cu e tabata drif den distancia sin cu tabata duna señal cu e tabata bon.
Mesora a bati alarma y mobilisa tanto polis na tera como maritiem pa asina cuminsa esfuerso di rescate. Na yegada no tabata mucho mas cu por a haci. E persona no tabata duna señal mas di bida. Asina mes ta sigui e protocol den caso asina. Ta pidi ambulance na sitio y despues lo notifica demas autoridad.
A baha e curpa na e pier di Bushiri caminda familiar tabata sperando caba. Asina mes tin di warda dokter pa constata morto como tambe demas autoridad pa investiga kico ta locual por a tuma luga den awa. Si acaso e persona lo a confronta problema den awa of a bira malo. Tur esey ta detaye cu lo conclui despues di investigacion.
Update: Confirmacion di famia a drenta cu ta trata di Gerard Pourier. Di famia di Boniero, persona cu a biba hopi aña na Aruba, banda di La Ronda na Playa. Pensionado ex-trahado di WEB Aruba NV y tambe ta omo di un di nos hefenan na Headlines Group, Patrick Paskel.
Headlines Group ta manda palabra di condolencia y forsa na famia di e fayecido.
