Desde 2012, Aruba a implementa un Ley di Cacho pa enfrenta e creciente poblacion di animalnan cu ta biba riba caya. Den e prome mandato di Gabinete Wever Croes, a desaroya un plan nacional pa aborda e situacion di cachonan riba caya. Den e di dos mandato, e Ministerio di Naturalesa a asumi su responsabilidad pa e bienestar di animal y a adapta e plan na National Plan for Stray Animals (NPSA).
Departamento di Control di AnimalDentro di e marco di e NPSA, ya a implementa varios paso di e plan, manera e creacion di un plataforma pa registracion di mascota, compilacion di material educativo pa scol basico y campaña pa stimula doño responsabel di mascota. Durante un conferencia di prensa dialuna 20 di november, Minister Arends a anuncia orguyosamente cu Ministerio di Naturalesa ta den e fase pre-ehecutivo pa construi e Departamento di Control di Animal.
Segun Minister Arends e centro aki ta clave pa maneha e situacion di cacho y pushi riba caya di un manera mas efectivo. Cacho y pushi recogi lo haya e atencion y cuido necesario, cu e meta pa nan haya nan doño bek of pa haya un hogar nobo bou di cuido di un persona responsabel. Ademas di aloca cacho y pushi, e centro lo tin espacio pa otro tipo di animal cu ta bao di e tratado di CITES.Diamars 21 di november 2023 ta inicia e destaho publico pa ricibi diferente proposicion di compania cu lo por asisti pa construi e Departamento di Control di Animal. Ultimo dia ta 20 di december 2023.
Maneho Durante e ultimo periodo, a colecta dato, ehecuta paso di e plan y evalua nan resultado. Nos comunidad ta enfrentando un reto serio debi n’e cantidad di cacho cu ta circulando den nos barionan. Nos Centro di Control di Cacho ta completamente yen y e fundacionnan cu ta traha riba e tereno aki a yega na nan capacidad maximo. Ta evidente cu e enfoke actual, cu ta poni enfasis riba e control di cantidad di cacho, ta trata e sintomanan y no ta resultando manera lo mester y ta creando mas problema. Aunke a diseñ e plan pa atende cu un problematica serio, ta keda claro cu no ta suficiente pa trata e problema na su origen.
P’e motibo aki, ta necesario introduci un maneho diferente cu un enfoke preventivo y holistico pa garantisa e bienestar general di animal pa mehora e relacion entre e hende y animal. Minister Arends ta menciona cu e ta desea di wak un Aruba cu ta conoci como un pais respetuoso y protector di tur ser bibo incluyendo e animal. E ministro ta continua ta bisa cu ta vital p’e ciudadanonan tur comprende cu e problematica di cacho y pushi riba caya no ta un problema di e animalnan mes, sino di nos hendenan. E falta di amor, empatia, respet y sentido di responsabilidad pa nos animalnan ta resultado di abuso, crueldad y e cantidad alarmante di cacho y pushi cu ta bandona door di nan mesun doñonan. Den un sociedad unda nos ta conoci pa nos hospitalidad, creatividad, y dinamismo, ta lamentabel cu nos no ta refleha e mesun respet y amabilidad na nos bestianan domestico.
Minister Arends ta menciona cu e maneho nobo lo ser trata na inicio di e aña nobo cu e colaboracion di stakeholder pa nan participacion, prome cu publica.Campaña di Fin di AñaNos ta drentando den e temporada di fin di aña, cu ta un periodo alegre pa mayoria di nos hendenan, pero ta un periodo di tortura y miedo pa nos animalnan. Nos ta lansa nos campaña di microchipping atrobe pa garantisa e siguridad di nos mascota durante e celebracionnan di fin di aña. E medida aki ta manifesta e compromiso di Ministerio di Naturalesa pa sigui garantisa e siguridad y bienestar di nos mascota den tur ocasion.Pa finalisa, Minister Arends ta pidi tur hende pa bira doño mas responsabel pa nan mascota. Evalua bo situacion bon prome cu busca un mascota nobo p’asina preveni e situacion caminda no por sigui provee cuido pa nan. Hunto nos por traha pa crea un Aruba unda nos ta conoci no solamente pa nos hospitalidad, sino tambe pa nos respet pa tur ser bibo, incluso esunnan cu no por papia.
