Den un karta parlamentario Jeser El Ayubi a manda skirbi Minister di Desaroyo Ekonomico, Steven Martina, riba e asuntu di fruta y berdura. E ta aksentua ku diálogo Demokrátiko sigur ta hasi nos pais mas grandi i mas konsiente di kiko ta tumando lugá den nos pais.
Alabes esaki ta duna nos pueblo partisipashon aktivo riba e tema (nan) enkuestion. Un inisiativa ku na nos opinion por trese gobièrnu mas serka di pueblo. Pero esaki no ta kita si ku ta gobièrnu ta esun responsabel pa ku toma final di e desishon (nan) i ehekushon di e akuerdonan palabrá. Ku otro palabra gobièrnu ta esun responsabel pa krea i ehekutá maneho. Promé ku gobièrnu tuma desishon mester tene kuenta kiko tur a pasa ku a kondusí na un diálogo ku pueblo. Nos no tin ku lubidá ku e problema a inisiá pa motibu ku gobièrnu di Venezuela unilateralmente a disidí pa sera frontera i stòp entre otro barkunan di fruta pa bini Kòrsou un biaha mas. Den kuminsamentu di aña e desishon aki a kondusí na hopi mal kontentu i frustrashon den nos pueblo i tambe na e preisnan astronómiko di fruta i bèrdura ku tambe a trese agitashon den pueblo. Aserka ta bini dilanti e echo ku imágen turístiko di Kòrsou a keda afektá.
Komo alternativa a bini dilanti pa nos eksponé nos mes produktonan di agrikultura, peska i artesania lokal den spotlight i asina duna oportunidat na nos mes hendenan pa para na Sha Caprilleskade. Pa ku esaki Ministerio di Desaroyo Ekonómiko a habri posibilidat kaminda no ménos ku 450 komersiante lokal a inskribí pa bende produktonan ariba menshoná i asina salba kara di Sha Caprilleskade. Un inisiativa ku sigur nos a karga i ta kere ketu bai aden.
Despues di a tuma nota di e komunikado di prensa di MEO relashoná ku futuro di Sha Caprilleskade nos ta hasi uso di artikulo 96 di Reglamentu di Orden di Parlamento pa hasi minister e siguiente preguntanan.
Minister tin garantia ku gobièrnu di Venezuela lo no bolbe sera frontera i bolbe stòp di laga e barkunan di fruta bini Kòrsou i asina un biaha mas perhudiká nos turismo i tambe suministro di entre otro fruta i bèrdura na nos poblashon?
Si esaki mester bolbe sosodé kiko e ‘backup plan’ ta teniendo na kuenta ku e situashon na Venezuela ainda ta delikado?
Konsulado di Venezuela tambe lo keda pone na altura di e proyekto aki?
Kuantu tempu e desaroyo di Sha Caprilleskade ta bai tuma?
Ta bai duna nos mes hendenan un ‘fair chance’ pa bende nan produktonan òf lo keda usa nan komo pinchhiter?
Kiko gobièrnu ta bai hasi ku e sentido di espektativa ku a krea serka e komersiantenan ku a inskribí?
Minister por informá Parlamento si tin un plan di desaroyo pa Marshe Nobo?
Aparte di Marshe tin otro lokalidat (nan) mas atraktivo i habrí pa nos mes hendenan eksponé nos produktonan na lokalnan i turistanan?
Teniendo na kuenta e importansia ekonómiko i balor turístiko di Sha Caprilleskade tin, nos lo apresiá si Minister kontestá nos inkietutnan den un tempu korto pa huntu nos saka lo máksimo pa Kòrsou i nos hendenan.
