Den presencia di habitantenan di bario, polisnan y Vice Presidente di Parlamento Sr. Alan Howell, Minister di Husticia Andin Bikker a haci e reapertura di e Warda di Polis di Bario di Mabon.
Habitantenan a desea di mira e warda aki den funcion y Sr. Howell a priminti su bario cu si e drenta Parlamento el lo cumpli. Minister di Husticia a scucha e grito y anhelo di e bario y a duna su palabra cu den poco tempo di su maneho e lo habri e post aki bek y nobo nobo y esaki a sosode diabierna ultimo.
Alan Howell kier a gradici no solamente Minister Andin Bikker cu a sa di cumpli cu e bario di Mabon y vecindario na un forma rapido, pero tambe Ministerio di Infrastructura y FCCA pa duna tambe nan cooperacion. “Nos ta sigur cu e polis di bario, Majoor Mathew lo sa di haci bon uzo di e warda ylo trece e siguridad bek den bario como debe ser”.
Finalisando Alan Howell a bisa cu ta orguyoso di por a mira e prome warda di Polis di Bario bolbe habri su porta na Mabon y cu pronto mas warda di Polis di Bario lo habri nan portanan bek, un muestra mas cu Gabinete Wever-Croes ta cumpli cu e plan di gobernacion. “Asina ta traha na bienestar di nos hendenan y Pais Aruba. Pabien na un y tur!”
