For di cooperacion internacional entre cuerponan di investigacion criminal na diferente pais, a resulta cu tin varios usuario di IP-adres na Aruba (aansluitingnan di Internet) cu ta envolvi den download y plama porno infantil. Jeugd- en Zeden Politie (JZP) y Recherche SamenwerkingsTeam (RST) a haci investigacion den e lunanan cu a pasa na e adresnan di IP Arubiano aki.
E investigacion a hiba te awor na detencion di tres sospechoso, cu pendiente e curso di e investigacion lo keda deteni preventivamente. E investigacion ta den full swing y no por exclui cu mas detencion lo cay.
Esaki ta prome biaha cu ta tuma luga un investigacion planifica di porno infantil na Aruba.
Abuso sexual di menornan di edad mester wordo bringa y tambe explotacion digital di e tipo di abuso aki. Posecion intencional di porno infantil y plama porno infantil ta castigabel pa ley, den articulo 2:196 di Codigo Penal di Aruba.
Afdeling JZP di Cuerpo Policial di Aruba tin e conocimento y e software necesario pa bringa e tipo di crimen aki. Si Bo tin informacion tocante porno infantil, yama tiplijn di Cuerpo Policial di Aruba na 11141.
