Felix Wu y Jendrick Wolff miho graduadonan di La Salle College

Diaranson merdia tabatin momento di alegria y tristesa na La Salle College na Playa ora cu e resultadonan di 2019 di examen a keda anuncia.

E resultado di prome tanda ta mustra cu 82% di e studiantenan a slaag. Esaki pa e director, Daniel brunk ta un bon resultado.”E ta practicamente mescos cu aña pasa,” e director a bisa. Sinembargo, el a sigui bisa, e porcentahe aki por subi ainda pasobra tin un grupo cu ta bay haci Her-Examen, cual naturalmente lo subi e porcentahe di graduadonan na final.

 

“Un 82% no ta malo pa prome tanda. Si compara aña pasa, el a keda practicamente mescos, pero mi ta haya cu no por haci comparacion,” el a bisa. E motibo cu no por haci comparacion cu otro scolnan kisas tin 30 candidato mientras cu na La salle College tin mas cu 100 candidato. “E docente- y studiantenan a haci nan esfuerso pa nos yega na e porcentahe aki di graduado. Dia 17 di juni awor e di dos tanda ta cuminsa y e studiantenan por cuminsa registra for di awe caba.

Studiantenan cu a pasa e prome tanda cu exito, a cuminsa celebra di biaha kibrando blaas pa mustra nan alegria. E miho graduado den 7 materia ta: Felix Wu: Ne (7); En (8); Na (9); Sk (9); Wi (9); Bi (9); y Ec (9). E miho graduado den 6 vak ta Jeandrick Wolff cu e materianan: Ne (7); En (8); Na (8); Sk (8); Wi (8) y Ec (8).Director Brunk tabatin e siguiente mensahe pa esnan cu ta bay participa den e segunda tanda di examen: Na e studiantenan mi ta conseha nan pa lucha y no entrega. La Salle College a produci hopi hoben bon pa comunidad, manera abou juffrouw,” el a bisa refiriendo na e reportero di 24ora.comEverlis Tromp, kende tambe ta un graduado di La Salle College.