Departamento di Impuesto ta preparando pa e plachinan di 2020

Pa 2020, Departamento di Impuesto ta bay duna Minister di Finansas un conseho. Y hunto cun’e, DIMP lo tin cu bay dicidi kico ta bay papia. Si mira e operacionnan di DIMP, nan focus ta pa garantisa cobransa di impuesto.

Pa facilita e cliente pa cumpli cu su debernan fiscal y tambe pa duna un servicio optimal, segun directora di e departamento, Luenne Pieters.DIMP no ta den e business di otorga plachi di number.

 

Si un impuesto di vehiculo di motor no ta paga, a base di ley por saca un cobransa adicional cu ta un naheffingsaanslag. DIMP a evalua con a bay cu 2019. E tabata un operacion hopi grandi cu hopi hende riba pia. A traha for di 8’or di mainta te cu 8’or di anochi. A traha den fin di siman. A cuminsa controla e plachinan for di momento cu nan a yega dia 24 di December. E trahadonan a traha overtime, durante dianan di fiesta pa asina controla e cargamento, pa Januari por a cuminsa start pa otorga e plachinan na esnan cu a paga caba den December.

Si wak un total bestand di 87 mil plachi en total, e ta un hazaña hopi grandi cu a haci como departamento pa percura cu den e dos lunanan di tempo, tur hende por a haya nan plachi di number y procesa e pago y tambe otorga e plachi di number. Pieters ta sigui splica cu tin cu bay evalua si tin cu keda haci’e di e manera aki, mirando e critica cu a haya como departamento, tin biaha husto, tin biaha inhusto. Por a wak cu durante momentonan di dia cu tabata mas rustig, por a atende mas cliente cu normal. Tur hende tabata acudi na DIMP parti mainta. Despues merdia no tabata tin cliente mas. Lo mester bay wak con pa sigui atende cu esaki na e manera aki of tin cu bay duna un otro departamento cu otorgamento di e plachi, mirando cu Departamento di Impuesto tin su meta pa cobra impuesto y no ta pa otorga plachi.

Responsabilidad

Kico ta un bon solucion? Coremente cu un plachi pa cinco aña largo a bin cu su consecuencianan, entre otro incumplimento pa DIMP, problema riba caya cu siguridad den trafico, autonan sin papel, sin nada. Pieters a splica cu mester bay sinta cu Cuerpo Policial y tambe e companianan di seguro pa mira kico ta e miho solucion den e caso aki. Tur ta sali perdi y a ripara esey. E incumplimento ta bira mas grandi si keda core cu e mesun plachi of en todo caso laga e clientenan core cu e mesun plachi pa mas cu tres aña. Seguronan tambe ta remarca cu e seguro di auto no ta wordo paga. E ora ta haya cu polis tambe ta bisa cu ora tin un accidente, e persona cu ta maneha e auto, no ta documenta. Pa tur tres departamento of organisacion, ta importante pa sinta na mesa, evalua kico ta nan rol y kico ta e miho manera, con ta e miho manera pa bay otorga e plachinan aki den futuro. E tin su efecto riba e entrada, cual ta toca departamento di Impuesto. E tin efecto riba criminalidad riba caminda, cual ta toca polis, y e companianan di seguro tambe ta bisa cu pa tin un auto riba caya, mester sigura e auto pa si en caso algo sosode, e gastonan por wordo cubri.

Plachi y seguro core aña pa aña

Luenne Pieters a comenta cu na momento cu acepta pago di belasting pa vehiculo di motor, e mester tin un seguro valido. Si e seguro ta caduca e siguiente luna, ainda DIMP ta acepta e pago. DIMP no ta ken pa bisa cu no ta acepta e pago pasobra e seguro ta caduca dentro di un luna. Mester sinta cu e companianan si seguro pa mira kico ta posibel. Nan tin polisanan cu ta firma caba. Pa bay haci un tramite asina, e lo por ta un molester. Mester mira kico ta factibel, kico ta mas practico. E no ta facil, segun Pieters. Si bo mira berdad consecuencia di uza un plachi di number pa mas cu tres aña riba e entradanan di DIMP, ta algo cu ta preocupa nan. Pero ta 87 mil plachi. Ta un cantidad hopi grandi cu lo mester wordo otorga den un temporada hopi cortico y esaki ta duna un reto den logistica cu e departamento no ta full ekipa pa por ubica tanto cliente na e mesun momento.

Impuesto

Ora cu a propone e tempo ey cu e ex minister di finansas pa por incorpora e impuesto di vehiculo di motor den accijnz, esey ta un conseho cu ainda ta riba mesa. Pero esey ta toca impuesto. Si esaki sosode, clientenan no mester bin na departamento di impuesto pa paga nan impuesto di vehiculo di motor, pasobra e ta forma parti di e prijs di gasolin. Pero ainda no a soluciona e problematica di e plachi. Kico ta haci cu e plachi. Plachi ta bira un vaste kentekenplaat. Por mira awo cu tin algun plachi den circulacion cu no ta un plachi otorga door di e departamento di Impuesto. Plachinan ta wordo falsifica. Tempo cu a traha cu sticker, nan tambe a wordo falsifica. Na 2019 a mira stickernan oranje cu blanco, a mira plachinan tambe cu ta falso, mirando cu no ta den e mesun tipo di letter cu DIMP a uza. Esey ta un desaroyo cu ta preocupante. Esey ta nifica cu no ta tuma a responsabilidad aki na serio. Si ta core cu un auto riba caminda publico, bo mester tin su plachi y impuesto paga y e seguro tambe mester ta paga.

Na momento cu ta bay kibra regla, traha nos mesun plachi, traha nos mesun sticker, nos no ta sigura nos auto, nos ta subi caya y no ta worry cu nada. E momento cu un accidente pasa, ta bida di hende ta core peliger, di muchanan, mama, tata di famia, esey ta un acto iresponsabel. Nos mester ta responsabel pa loke ta nos impuestonan y e reglanan cu tin. Ta algo cu tin cu ay wak di cerca ta con ta bay haci pa con por ta mas eficiente den otorgamento di plachi y sinta cu e departamentonan concerni tambe pa un solucion, Pieters a comenta por ultimo.