A detene un homber diaranson anochi despues di a drenta den e catedral di New York cu dos jerrycan di gasolin y likido pa cende BBQ, segun polis a indica, poco dia despues cu un candela a daña gravemente e catedral di Notre Dame na Paris.
John Miller, responsabel di e Departamento di Polis di New York (NYPD), a afirma cu e individuo aresta, a alega di a tuma un short cut atrabes di e catedral, despues cu su vehiculo a keda sin gasolin, aunke su respuestanan tabata “incoherente y evasivo.”
“Nos ta ignora cua ta su estado mental, y su motivacion,” Miller a bisa den un rueda di prensa dilanti di e catedral di St. Patrick, un structura gotico den e curason di Manhattan.
E homber a wordo gara pa un agente di siguridad cu a puntr’e unda e tabata bayendo y el a informa cu e no por drenta den e catedral cu e obhetonan ey, polis a splica.
“Na e momento ey, aparentemente e gasolin a basha abao ora cu (e homber) a bira,” Miller a precisa.
Alerta, e agentenan di e oficina di lucha contra terorismo di NYPD a gar’e y a detene despues di un interogatorio.
“El a conta cu e tabata pasando e catedral…., cu su vehiculo a keda sin gasolin,” Miller a splica. “Nos a wak su vehiculo. No tabata falta gasolin y nos a detene,” el a precisa.
E individuo, di 37 aña, tabata “conoci pa polis,” cu ta investigando su antecedentenan.
E construccion di e catedral di St. Patrick a conclui na 1878. Despues cu a añadi ampliacionnan y tabata obheto di un gran restauracion cu a caba na 2015.
Dialuna, un incendio a causa destrosonan grave na e catedral gotico di Notre Dame di Paris, un di e monumentonan mas bishita di mundo.
Investigadornan ta provilegia e pista accidental. E catedral di Notre Dame tabata den renobacion.
