Dia 28 di October 2018, a asesina Dairon Alberto durante un tiroteo den e districto di Katendrecht na Rotterdam.
Un ekipo di 25 recherche a bin ta realisando investigacionnan continuo desde e nochi fatal aki. Recientemente e investigacionnan a expande pa Corsou. Awo Miniserio Publico ta ofreciendo un recompensa di 25 mil Euro pa e tip di oro den e investigacion.
Likidacion
Un di e scenarionan di e team di investigacion ta cu e tiroteo mortal di Dairon un biaha mas lo hiba na un otro tiroteo. Pa kibra e spiral di violencia, tin mester di ayudo di informante. E suposicion ta cu tin mas hende cu por tin informacion importante, pero no kier comparti esaki cu polis. Polis y Ministerio publico ta comprometi na preveni un tiroteo nobo den e area residencial cu posibilidad di victimanan inocente. Ta p’esey Ministerio publico a pone 25 mil Euro disponibel pa e tip di oro cu por hiba na e autornan di e tiroteo den Rechthuislaan.
Imagennan
Opsporing Verzocht a mustra previamente dos hoben di color scur, kendenan riba diadomingo, 28 di October tabata coriendo riba un Piaggio Skipper, den direccion di Rechthuislaan, unda cu Dajo na e momento tabata papiando cu algun amigo riba caya. Eynan, e tirado, kende tabata sinta riba e parti patras di e scooter, a bay den direccion di e grupo cu un arma automatico y a tira riba tur hende. Esaki tambe a keda ilustra riba e imagennan. Despues por a mira cu e grupo di amigo a huy, pero solamente Dajo no por a scapa na tempo.
El a muri poco despues riba caya. Tambe tin imagen di e tirado hunto cu e conductor di e scooter cerca di Schulpweg, unda cu nan a kima e scooter.
Corsou
E team di investigacion ya a ricibi varios tips cual a wordo investiga. Un di e tipnan ta cu (un di e) autornan a huy bay Corsou. Ta pa e motibo aki e team a tuma contacto cu polis di e isla pa cuminsa eynan tambe cu un investigacion. Tambe polis Hulandes ta haci un yamada na e habitantenan di Corsou. E autor(nan)lo a of tin posibel contactonan, cu por nifica cu tin persona cu sa mas.
Ta pa e motibo aki mes polis Hulandes a pone un number disponibel +31-3459876, sea yama of tambe via number di WhatsApp +31-6-10000012 pa duna mas informacion. Tambe nan por manda un email na [email protected].
