Around the World in 80 days, West Side Story, The Godfather, Back to the Future, Titanic, Gladiator i Argo tabata pelíkulanan ku a kibra rèkert na takia den añanan 50, 60. 70, 80, 90 i siglo 20. Sin duda nan tabata eksitoso!!!Un bon biní speshal na un i tur, en partikular
Gobernador sra. George Wout. Minister presidente Sr. Rhuggenaath, Minister Sr. Martina, Minister Sra. Leito, Minister Sra. Camelia-Romer, Minister Sr. Koeyman i Minister sr. Gijsbertha.
Un bon biní tambe na CEO di Janssen de Jong Groep Sr. Hans Smits
Invitadonan, miembronan di prensa, demas miembro di gerensia di Curacaose Wegenbouw Mij, Mijnmaatschappij, BetonIndustrie Brievengat, Albo Caribbean, ALBO Aruba, Arubaanse Wegenbouw Mij i Windward Roads St. Maarten bon bini.
Bon biní na:
E PREMIERE DI 2 BILLION SECONDS #BONRIBAKAMINDA.
Pa ami ta un honor komo direktor di Curacaose Wegebouw Mij pa yama bosonan danki pa honra nos ku boso presensia. 65 aña CWM ta nifiká hopi pa nos ku ta empleá akinan i naturalmente pa bosonan ku durante e 64 añanan aki a pone konfiansa den CWM i su empleadonan.
Kon mas mihó pa nos yama bosonan danki dor di trese bosonan tur huntu den e sala aki.
E kompania mama kende ta Janssen de Jong a bini Kòrsou pa un proyekto riba aeropuerto Hato. Komo ku a surgi tardansa den ehekushon di esaki a bini e oportunidat pa un proyekto riba e isla di Haiti. Esaki a resultá den pèrdida kuantioso ku a pone ku e kompania a regresá Kòrsou masha lihé bek. Asina e historia eksitoso di Curacaose Wegenbouw Mij a kuminsá na 1953. Durante e 64 añanan ku ta tras di lomba ta masha hopi proyekto CWM tabata enbolbí aden. Nan ta muchu pa mi menshoná. Ta p’esei e motibu pa trese e historia aki den e shortfilm: 2 BILLION SECONDS #BONRIBAKAMINDA.
CWM durante di su historia tabatin diferente momento di kambio ku a tuma lugá, kada bes pa alsa e ekselensia i kalidat di e kompania i pa asina brinda e mihó servisio na nos klientenan i pa sigurá un bon komunikashon.
E éksito di Curacaose Wegenbouw Mij ta danki na su empleadonan. Esnan ku ta laborando, esnan ku a bai ku penshun i esnan ku ya no tei mas na e mundu aki. Esaki sin kita nada afó di e konfiansa risibí di e gerensia di Janssen de Jong Groep.
Kalidat, Integridat, Siguridat i lealtat ta palabranan ku ta ankrá den nos manera di operá.
Nos ta kontentu di por a aportá na proyektonan sosial durante di e añanan ku ta tras di lomba. E último proyekto ta: Churandy Martina ku mira riba Tokyo 2020.
CWM i su empleadonan a commit nan mes i lo partisipá na e World Clean Up Day Curacao di 15 di Sèptèmber próksimo.
Pa terminá mi kier trese dilanti ku apesar ku Kòrsou no ta pasando den su mihó tempu ta momento pa nos bini ku ideanan inovativo pa asina krea oportunidat nobo pa garantisá empleo pa e trahadónan riba nos isla di Kòrsou.
Mi kier agradesí bosonan un bes mas pa e konfiansa duna na Curacaose Wegenbouw Mij.
Ban sinta i disfrutá di e lokual ku nos aktornan a prepará pa bosonan.
LUZ, KAMARA i AKSHON.
