Awe a haya e noticia cu un persona masha stima den comunidad, Zuster Judith Croes a fayece recientemente. Un noticia cu, masha poco tabata sa di dje, a afecta no solamente famia, pero tur esnan cu a conoce Zuster Judith.
Elda Edith Croes a nace dia 1 di juni 1945. El a tuma e nomber di Zr. Judith ora el a haci su promesa perpetua na aña 1965 den e congregacion di e Missiezusters Franciscanessen van de Heilige Antonius van Padua, miho conoci como e soeurnan Franciscanonan di Asten. Na Aruba Zr. Judith a traha hopi aña como enfermera y despues a studia teologia.
E soeurnan Franciscano di Asten a yega Aruba dia 5 di februari 1957 pa asina tuma encargo di hospital for di e soeurnan Dominicas. For di su mesun testimonio Zr. Judith a bisa cu tabata Zr. Anacleta d.f.m. cu a pon’e realisa su vocacion pa bira un soeur.
Zr. Judith a fayece trankilo dia 10 di april 2024 na e Missiehuis na Asten, Hulanda. Nos ta duna Dios danki pa e bida di Zr. Judith y ta gradici’e pa e trabaonan cu tur nos religiosonan a haci cu amor pa Aruba. Misa pa su descanso lo tuma luga dialuna 22 di April pa 7 pm na Parokia Inmaculada Concepcion na Santa Cruz.
