Zulema Erasmus ta hefe di e departamento di exterior y desaroyo comercial na Departamento Economico. A papia cu ne mirando cu e ta dirigi e delegacion den e mision comercial cu tin na Bogota. E mision aki for di september aña pasa a cuminsa a cuminsa traha riba dje.
A haya indicacion di minister di economia Geoffrey Wever cu un mision comercial pa Bogota lo ta interesante. Camara di Comercio ta un partner importante y ta traha hopi di cerca cu Departamento di Asuntonan Economico. Zulema Erasmus a splica cu hopi biaha ambos ta comparti e trabou hunto. A cuminsa combersacion pero kier a midi prome e interes cerca e companianan na Aruba mes.
A tene un reunion fin di februari unda a diescinco compania a asisti. Eynan a scucha si Colombia ta interesante si of no y tambe kico ta e retonan. A base di esaki a sigui cu e programa papiando cu embahada di reino staciona na Bogota. Holland House a bira un partner di Aruba pasobra ta habri tambe un oficina di Aruba den Holland House. Zulema Erasmus a splica tambe cu e trabounan a sigui pa culmina na e inicio di e mision na Bogota.
E interes ta hopi den comercio pa busca un contacto estrecho cu Colombia y importa producto for di Colombia. Nan no kier promove hopi e parti di cuminda directamente mirando cu tin reto cu logistica. Zulema Erasmus a splica cu minister lo papia cu diferente instancia di gobierno di Colombia den e bishita aki. Tambe lo sinta cu e gremionan encarga cu barco (embarcacion) y e representantenan di waf. Aki lo sinta pa atende e parti di logistica.
Basa riba e problema di logistica a enfoca mas riba e otro area di producto manera material di construccion y diferente producto cu por ta un exito pa mercado di Aruba. Banda di esaki a haya interes di companianan cu ta interesa den e servicionan cu Aruba por exporta pafo di Aruba. Zulema Eramus a bisa cu den mesun mision un compania di Aruba a keda di habri un oficina na Bogota. Finalmente a splica cu Aruba tin sector economico interesante banda di turismo.
