For di Fitch Ratings a ricibi e noticia cu e credit rating (grado di credibilidad financiero) di gobierno di Aruba a wordo manteni.
Esaki ta resultado di un evaluacion teni door di Fitch Ratings despues di un bishita di trabao efectua na Aruba den final di e luna di Maart caminda cu a topa cu varios actornan den gobierno y sector priva.
E ratings outlook, cual ta refleja e prospecto cu Fitch ta hiba pa un mejoracion di e rating den futuro immediato, a bira negativo. Esaki ta reflejo di e hecho cu e crecemento economico cu a wordo pre-mira bou di gobernación anterior no a ser materialisa. Esaki pa gran parti ta debi na e situacion rond di e posibel re-apertura di e refineria.
Fitch ta comparti e pensamentonan di Gobierno actual cu ta boga pa un crecemento económico mas realistico den e anja cu ta bin. Fitch ta indica cu apesar cu den e anjanan anterior crecemento economico tabata menos toch gobierno anterior tabata indica cu lo reduci e deficitnan financiero. Esaki, manera ya ta conoci, despues di varios intentonan incidental door di e gobernación anterior no a duna fruto mas desde anja 2017.
E resultadonan financiero ta conoci pa un y tur. E falta di tuma pasonan structural e tempo ey combina cu un crecemento económico menos cu projecta ta ser mira como e motibonan principal pa e situación financiero actual.
Fitch ta duna reconocemento na e decisionnan dificil tuma e anja aki pa e gobernación actual pa purba reduci di manera structural e deficitnan fiannciero. Como otro puntonan fuerte cu ta ser accentua pa Fitch pa e grado di credibilidad ta e stabilidad politico, e grado halto di desaroyo y e relacionnan constitucional cu Hulanda.
Gobierno di Aruba, en particular e ministro encarga cu Finanzas, Economia y Cultura, Sra. Xiomara Ruiz-Maduro, kier gradici tur esnan cu di un forma of otro a coopera na e resultado aki. Apesar di e desafionan financiero grandi nos dilanti, a logra cuminsa gana e confiansa bek di esnan cu tin di evalua credibilidad financiero di gobierno. Masha danki na un y tur y hunto nos lo saca Aruba dilanti.
