E team di Departamento di Higiena, Departamento di Asuntonan Economico y cuerpo Policial ta sigui cu nan control den diferente supermercado riba nos isla.
Ta enfoca riba diferente area, entre otro prijsnan di canasta basico, ta controla tambe higiena, ta controla productonan si nan fecha ta bon y tambe ta haci otro control, e biaha aki na Noord y na Oranjestad. Entre otro di permiso, di negoshi, cual ta den man di Cuerpo Policial. Durante e controlnan aki, a hala atencion di varios di e personanan cu ta responsabel, doño di supermercado. Tambe durante control na Sunny Supermarket na Saliña Cerca, mirando cu e luga no ta cumpli cu reglanan di higiena, a bay over na cera e localidad aki. Despues cu personal di Asuntonan Economico, Salubridad Publico, polis a bandona e sitio, algun minuut despues, e Chines a habri e luga bek.
Y clientenan tabata drenta y sali manera normal. Asina mes polis a haya un tip y a bolbe. A hala atencion seriamente di e Chines kende tabata responsabel e momento ey. E Chines a bisa cu tabata wardando hende pa bin haci e luga limpi, despues cu Departamento di Higiena a laga cera e luga. Pero polis a mustr’e cu e luga no por keda habri. El a wordo cera y ta keda cera pa un dia y despues cu control’e atrobe pa e Departamentonan concerni, nan mag di habri bek, ora cu e ta na ordo. E controlnan riba diaranson tabata den area di Noord. A bishita Fung’s Supermarket na Noord, a bishita Sunny Supermarket na Saliña Cerca y tambe Ting Wei cu ta keda na altura di Rooi Santo. Pero Sunny Supermarket tabata e supermercado cu a cera.
Mientras tanto na Playa, controlnan tambe a tuma luga y a laga cera Kong Hing den Havenstraat, pa cosnan cu a constata. A controla tambe Morocho Supermarket den Hendrikstraat y Wan Li Supermarket den Lucianitastraat.
Controlnan ta continua. E siman aki Departamento di Asuntonan Economico, polis y Departamento di Higiena, ta basta activo cu nan control riba prijs, higiena y permiso etc. den supermercadonan.
