Diabierna mainta trempan Minister Presidente mr. Evelyn Wever-Croes a anuncia riba Facebook cu Aruba no a haya KB y cu KB ta for di mesa y no ta riba agenda mas di Koninkrijks Ministerraad. Pero, no a dura mucho cu Secretario di Estado Raymond Knops a sali pa caba cu e “celebracion” di e logro. El a papia henter un otro idioma cu esun di e prome mandatario di Aruba. A menciona cu a bolbe duna Aruba un luna mas pa cumpli, sino otro luna lo atende atrobe durante Rijks Ministerraad. Ta hopi obvio cu un hende no ta papiando berdad aki!
Premier Evelyn Wever-Croes: “Maske cu esaki no kiermen cu tur problema ta soluciona, mi ta hopi satisfecho cu nos no a haya un KB, y cu nos a haya mas tempo y espacio. Ami no sa nada di un deadline di 18 di october, mi a tende esey den prensa, pero mi mes no a haya nada oficial di Hulanda riba esey y esey no a wordo palabra tampoco den Rijks Ministerraad. Pues mi no ta tuma algo asina na serio tampoco. Dia Hulanda cuminsa comunica cu Aruba via cierto prensa, nos ta hopi leu for di cas. Pa nos esaki ta un empuhe pa sigui cu nos compromiso pa cumpli cu e protocol y asina saca Aruba for di problemanan serio financiero y pa Aruba haya su propio organo independiente di supervision. Danki na tur cu a haci posibel cu nos ta asina leu. Union ta nos forsa”.
