Awe mainta pa 8:30 am a bin topa cu un grupo di trahado para pafo di Diamonds International, situ ana L.G. Smith Boulevard. Segun a bin compronde na sitio, ta trata aki di un grupo di trahado cu a sali pa demostra nan malcontento cu e trato ricibi na pia di trabou. Segun presidente di sindicato FTA, mr. Hose Figaroa, a splica ta apenas algun dia pasa e sindicato a gana un referendum pa representa e trahadonan na Diamonds International.
Despues di esaki, como sindicato nan a spera cu como compania responsabel Diamonds International lo opta pa sinta na mesa pa negosha y drecha e situacionnan fastioso cu tin andando, pero a haya e sorpresa cu en bes di esaki, a sinta pone presion rib’e trahadonan, ‘pest’ nan y hasta bisa cu mester cuminsa kita algun hende for di trabou. Pa e ultimo aki nan a bin cu e excuus cu e schedule di barco ta abou, esaki despues cu durante henter pandemia nan no a ‘lay off’ ningun hende, Figaroa a splica.
Segun Figaroa, ta bisto cu e dunadonan di trabou ta tumando represaya contra e trahadonan pasobra nan a dicidi di uni nan mes na un sindicato. “Mi ta kere nan mester tin berguensa di con nan ta actua…mi no sa con leu nan sa di esaki internacionalmente.” Figaroa a manda un mensahe “hopi duidelijk” bisando cu “esaki no ta e forma pa trata trahado”, añadiendo cu mester respeta e leynan cu tin na luga pa proteha e trahadonan.
Na su turno, Jibel Ruiz, trahado di Diamonds International pa 21 aña largo, a splica cu prome cu nan a dicidi di uni na e sindicato, nan tabata enfrenta hopi abuso di parti di e dunado di trabou y ta pa es motibo a dicidi cu ta basta y a busca conseho cerca sindicato. Diripiente a trece un hende di afo pa bisa e grupo cu a drenta den e sindicato, mas o menos trinta trahado, cu lo ofrece nan un pakete pa bay cas. Ruiz a agrega cu no por papia di cu e situacion di e compania ta malo ya cu nan ta bendiendo basta ultimamente cu e fluho di turista cu Aruba ta ricibiendo.
Pa un relato mas amplio, lesa edicion di TREMPAN.
