Den un carta oficial na sindicato SIWA siman pasa, director di WEB Aruba NV a informa cu lo no retene parti di salario di trahadonan mas. Desde mei tabata retene porcentahe di salario, pa cumpli cu peticion di gobierno, siendo doño di WEB, pa yuda na e fondo di FASE. Pero segun Luis Oduber, como cu mayoria compania di Gobierno no ta retene ni aporta, cu WEB tambe a dicidi di stop.
Esaki sin duda lo hinca Gobierno den un posicion mas dificil ainda financieramente. Specialmente pa por cumpli cu tur e gastonan cu e fondo di emergencia FASE ta trece cu ne. Mensualmente gobierno ta subsidia e fondo cu miyones pa yuda esunnan cu a perde nan trabou den e pandemia. Cada ciudadano cu aplica y nan acepta, ta cobra 950 florin tur luna.
Di otro banda, e matutino Solo di Pueblo a informa awe cu gerencia di WEB a dicidi di duna cada trahado un cadeaubon di Afl. 500 pa cumpra na supermercado di Do it Center. E corant ta estima cu e bonus aki ta costa WEB riba 180 mil florin.
Ta conoci cu e companianan di utilidad anualmente ta paga bonusnan grandi na nan trahadonan, incluyendo fiestanan grandi di fin di aña, cu banda biniendo di Corsou, etc. Gobierno a papia na mas di un ocasion di solidaridad di esunnancu schoudernan mas hancho, pa aporta na esunnan cu tin’e mas duro.
No ta conoci opinion di Gobierno riba e posicion fuerte aki cu WEB a tuma, den cual ta nenga di sigui un ordo directo duna dor di Minister Presidente. Tambe lo mester wak kico ta e motibo cu otro companianan estatal no a kita placa for di nan trahadonan y tampoco aporta na e fondo di FASE, manera cu WEB si a haci tur luna desde mei 2020.
