Awe nochi pa 8:00pm diferente automobilista a nota un pick-up color blanco ta core masha malo riba e caminda di Piedra Plat direccion pabou. E tabata core masha slow y tin biaha hasta memey di caminda. Un patruya di Polis a para e auto despues di rotonde di Paradera na otro banda di “AutoMaxx”. Polis a constata mesora cu e chauffeur masculino no por stuur mas.
Por a nota cu e chauffeur tabatin dificultad pa para straight riba pia y tabata busca manera pa leun riba auto di Polis y despues a baha e baki di su pickup pa e sinta. Polis tabatin basta pasenshi cu e meneer, cu ya tin un edad respeta caba.
Ora mester a transport’e pa ward’i polis, e chauffeur a kere sigur cu lo a hib’e den su mesun pick-up. El a hasta habri porta di su vehiculo pa e drenta na banda di chauffeur. Polisnan mester a splic’e cu e mester drenta den Transportwagen y cu no ta cas e ta bay sino cel na ward’i polis.
Na final polisnan a pusha e pick-up mas na banda di caminda pa asina no forma peliger pa trafico. Ora a check e Pick-up pa cualkier cos valioso, a bin topa cu un boter cu contenido parecido di alcohol.