“Gerencia di WEB a tuma nota di varios publicacion di cifra cu supuestamente ta haci referencia na salario di empleadonan di WEB Aruba”, asina un relato di prensa emiti door di e compania nacional di produccion y distribucion di awa y coriente ta inicia bisando. E ta referi na e publicacionnan prome den Solo di Pueblo, despues di parlamentarionan di MEP y ultimo siman den Diario, den cual ta insinua cu trahadonan di WEB tin un salario mucho halto, incluso cu mas di 20 di nan ta gana mas di 42 mil florin pa luna!
“Gerencia ta lamenta profundamente e publicacion aki; a mal interpreta cifranan pa haci e publicacion. WEB Aruba tin un structura salarial defini y ta aplica esaki pa cada funcion”, asina e vocero di e compania estatal a sigura.
WEB Aruba ta hiba un maneho responsabel, ta respeta privacidad di informacion di su empleadonan y no ta publica cifranan relaciona cu esaki. Si un persona of media (Diario y Solo di Pueblo) ta desea cualkier otro informacion for di WEB Aruba, por tuma contacto libremente via nan formulario di contacto riba webaruba.com.
Ta mas cu obvio cu henter esaki ta parce un strategia di gobierno, purbando pa desprestigia e trahadonan di WEB y nan sindicato SIWA den nan afan pa corta den nan salario y forsa e compania pa firma un acuerdo cu e compania Eagle LNG pa provee gas na WEB. Te cu awor e compania y su ehecutivonan ta para duro pa integridad di e compania y pa tuma decisionnan den cuadro di ley y reglanan di bon gobernacion.
